Pasi fitoi një mandat tjetër 5-vjeçar në pallatin presidencial francez, Emmanuel Macron synon të kthehet në punë menjëherë në politikën e brendshme dhe të jashtme. Së shpejti ai do duhet të përballet me zgjedhje vendimtare parlamentare ku duhet të luftojë për të mbajtur shumicën e tij.
Ja një vështrim se çfarë vjen më pas për Macron dhe udhëheqjen e tij në Francë.
Ceremonia e inaugurimit
Këshilli Kushtetues do të publikojë të mërkurën rezultatet zyrtare të zgjedhjeve presidenciale. Në të njëjtën ditë, Macron do të mbajë një mbledhje të kabinetit.
Macron më pas do të duhet të caktojë një ditë për ceremoninë e inaugurimit e cila duhet të mbahet deri më 13 maj në pallatin Elysee.
Ai do të marrë nderimet e Gardës Kombëtare dhe do të mbajë një fjalim.
Sipas traditës qëllohet 21 herë me top për të shënuar inaugurimin, megjithëse presidentët Francois Mitterrand dhe Zhak Shirak e anashkaluan traditën në vitet 1988 dhe 2002..
Macron është i vetmi udhëheqës i Francës moderne që fiton një mandat të dytë në kutinë e votimit.
Lëvizjet e para të Macronit
Ashtu si pesë vjet më parë, Macron planifikon të shkojë në Berlin, në përputhje me traditën që parashikon që presidenti i sapozgjedhur të bëjë udhëtimin e tij të parë jashtë vendit në Gjermaninë fqinje për të festuar miqësinë e vendeve pas luftërave të shumta.
Ai do të takohet me kancelarin Olaf Scholz dhe do të diskutojnë përpjekjet për t’i dhënë fund luftës në Ukrainë.
Në një moment, ai mund të udhëtojë gjithashtu në Kiev për t’u takuar me presidentin ukrainas Volodymyr Zelenskyy, një udhëtim që ai tha se do ta bënte vetëm me kusht që të kishte “një ndikim të dobishëm”.
Macron foli me Zelenskyn dhe Scholz pak orë pas fitores së tij, raporton ABC.
Më 9 maj, Macron pritet të mbajë një fjalim për Evropën në Strasburg, shtëpia e parlamentit të BE-së.
Zgjedhjet parlamentare
Kryeministri Jean Castex pritet të paraqesë dorëheqjen e qeverisë së tij në ditët në vijim. Macron më pas do të emërojë një qeveri të re të përkohshme, por ministrat do të jenë në vend vetëm për disa javë. Zgjedhjet parlamentare mbarëkombëtare, të planifikuara në dy raunde më 12 dhe 19 qershor dhe do të vendosin se kush do të kontrollojë shumicën e 577 vendeve në Asamblenë Kombëtare. Nëse partia e Macron fiton, ai do të emërojë një qeveri të re në përputhje me rrethanat dhe do të jetë në gjendje të miratojë ligje.
Nëse një parti tjetër merr shumicën e vendeve, ai do të detyrohet të emërojë një kryeministër që i përket asaj shumicë të re. Në një situatë të tillë, të quajtur “bashkëjetesë” në Francë, qeveria do të zbatonte politika që ndryshojnë nga projekti i Macron. Megjithatë, presidenti francez do të kishte ndikim mbi politikën e jashtme të vendit.
