Shqipëria dhe Azerbajxhani ranë dakord të bëjnë disa hapa përpara në sferën e energjisë dhe turizmit, tha në një intervistë për Trend Kryeministri Edi Rama. Kreu i qeverisë ka dhënë intervistë për mediat vendase për të cilat është shprehur se gjatë takimit është diskutuar edhe për furnizimin me gaz. Në artikull shkruhet se Rama vuri në dukje se kompanitë shqiptare janë të interesuara për të investuar në Karabak.
“Ne kemi marrëdhënie shumë të mira dhe ky është një moment diskutimi se si mund të forcojmë marrëdhëniet tona dhe si mund të ecim përpara me më shumë investime, më shumë turizëm, më shumë lidhje mes njerëzve tanë. Ka hapësirë për zgjerimin e marrëdhënieve tona ekonomike. Prandaj erdha këtu sot dhe patëm një bisedë të gjatë me presidentin Ilham Aliyev, kryeministrin Ali Asadov. Ne ramë dakord të bëjmë disa hapa përpara në fushën e energjisë dhe turizmit. Ekipi teknik do të fillojë ta shikojë dhe shumë shpejt do të kemi një vlerësim se çfarë do të bëjmë më pas”, tha Edi Rama.
Duke iu përgjigjur pyetjes se në cilat sfera Shqipëria do të donte të shihte investime, Kryeministri tha se energjia dhe turizmi janë dy drejtimet.
“Vitin e ardhshëm do të kemi 30 vjetorin e marrëdhënieve tona diplomatike dhe do t’ia kushtojmë gjithë javën Azerbajxhanit në Shqipëri. Do të ishte mirë të kishim ambasada në të dyja vendet”, përfundoi Rama.
