Serbia ka dashur të abstenojë nga votimi për pezullimin e Rusisë nga Këshilli për të Drejtat e Njeriut i Kombeve të Bashkuara, por për shkak të presionit u vendos që të votojë pro rezolutës, tha presidenti serb, Aleksandar Vuçiç.
“Vendimi ynë ka qenë që të jemi të përmbajtur dhe pastaj vijnë presione të panumërta, të rënda që nuk kanë të bëjnë me anën personale. Askush nuk më ka ardhur dhe nuk më ka thënë, as më ka shantazhuar, por po shantazhojnë vendin… Thoshin ‘A e dini se sot apo nesër do të vendoset nëse do të përjashtohemi nga pakoja e sanksioneve për naftën”, tha Vuçiç në një intervistë për Radio Televizionin e Serbisë.
Siç shpjegoi Vuçiç, Serbia është një vend neutral ushtarakisht, por jo politikisht. “Serbia është në rrugën europiane. Ne jemi një shtet neutral ushtarakisht, por nuk jemi një shtet politikisht neutral, ne jemi në rrugën evropiane”, shtoi Vuçiç. Presidenti i Serbisë tha se kërcënimi me sanksione dhe ndalimi i rrugës europiane po “rri pezull” mbi Serbinë, për shkak të qëndrimit të Beogradit ndaj Moskës.
‘Më pëlqen Perëndimi, e dua shumë Rusinë, por Serbinë e dua më së shumti në botë’, tha Vuçiç, duke theksuar se Serbia është i vetmi vend në Evropë që nuk ka vendosur asnjë masë kufizuese ndaj Rusisë për shkak të pushtimit të Ukrainës.
