Nga Mero Baze
E dimë të gjithë që Edi Rama mund të zgjedhë president kë të dëshirojë, por duket që ky nuk është objektivi i tij. Ai ka bërë të qartë që pret propozime serioze nga Partia Demokratike (jo e Berishës) dhe mund të ulet me ta në bisedime për një paketë dhe më të gjerë, siç mund të jetë Avokati i Popullit. Është interesante se gjithë tërbimin ndaj negociatave për president e ka zgjuar pikërisht se është kuptuar që Edi Rama është gati të bisedojë për president. Fakti që janë bindur se Edi Rama është gati të negociojë për president ka shkaktuar një stuhi sulmesh ndaj negociatave, a thua se detyrimi kushtetues për një president konsensual, i sanksionuar në Kushtetutë nga vetë Sali Berisha, tani është krim, meqë Sali Berisha është një “person non grata”, i cili duhet mbajtur si gjithë të tjerët larg zyrave të shtetit shqiptar.
Pra vetëm pse Berisha nuk ka shans të bisedojë për presidentin, apo të ofrojë kandidatura, e ke lehtë të kuptosh se kush është me të në shtyp apo opinion publik, pasi kuptohet nga urrejtja që nxisin kundër negociatave. Madje fantazia e Berishës ka shkuar aq larg sa duke përdorur një të patru si Flamur Noka, printon në letër gjithë haluçinacionet e tij dhe i i paraqet si marrëveshje Rama- Basha në Dhërmi.
Pra nëse do të kuptosh çfarë nuk do Sali Berisha, shiko çfarë shpik ai për rivalët e vet në opozitë, sikur po e bëjnë, dhe kupton që ato janë gjërat që ai do të dëshironte të ishin të ndaluara. Dhe mes tyre shquan kjo ideja e negociatave për presidentin.
Kjo duket se e destabilizon, e lë pa gjumë dhe akoma më keq, e fut në paranoja se mos ka një plan që presidenti t’i jepet dikujt nga Partia Demokratike që është në luftë me të, dhe kjo i duket fundi i botës.
Ndaj gjithë tërbimi me të cilin helmatiset opinioni publik rreth negociatave për presidentin buron vetëm nga frika se ato kanë vërtet shans. Se po të mos kishin vërtet shans, nuk kishte për t’u shqetësuar as Berisha, as shtypi pro tij dhe as ithtarët e tij nëpër ekrane. Madje as Fatmir Mehdiu. Të gjithë ata që thonë se “nuk është nevoja për negociata për president” meqë e ka në dorë Edi Rama, janë thjesht duke shprehur frikën se mos Edi Rama u ofron presidentin dhe ndonjë marrëveshje më të gjerë, rivalëve të tyre në opozitë.
Nuk janë të mërzitur se Edi Rama nuk e jep presidentin. Janë të mërzitur pikërisht se e shikojnë të mundshme që ai mund t’ua ofroj atë opozitarëve, por jo berishistëve.
