Pushtimi i Ukrainës nga Vladimir Putin ka pësuar një sërë pengesash, ndërsa lufta shënon ditën e saj të 114-të. Në shenjën e fundit të taktikave fatkeqe të Rusisë, Ministri i Mbrojtjes i Ukrainës zbuloi urdhrat e shkruara ushtarake që u morën nga një oficer rus i vrarë. Oleksiy Reznikov tha se taktikat ishin “çuditërisht naive” dhe tregonin planin e luftës së Vladimir Putin.
220505171400-09-russia-ukraine-victory-day-putin-exlarge-169
Ai tha se urdhrat ushtarake të marra në javën e parë të luftës treguan se komandantët ushtarakë rusë prisnin një “sulm të shpejtë dhe të lehtë”.
Reznikov shpjegoi: “Oficeri që u vra, ishte urdhëruar të ishte në lagjet e qeverisë në qendër të Kievit 12 orë pas fillimit të pushtimit.
“Ai u urdhërua të merrte nën kontroll të gjitha ndërtesat qeveritare, zyrën e presidencës dhe parlamentin”.
“Ata ishin të sigurt se brenda 72 orëve presidenti do të evakuohej nga vendi”.
Ai gjithashtu i tha CNN se ministrat e mbrojtjes të Mbretërisë së Bashkuar dhe SHBA-së, Ben Wallace dhe Lloyd Austin i kishin premtuar atij se ndihma e tyre ushtarake kundër Rusisë “nuk do të ndalet kurrë”.
Reznikov u shfaq optimist për luftën kundër Rusisë, duke thënë: “Ne do të çlirojmë të gjithë territorin tonë – përfshirë Krimenë”.
Kjo vjen pasi shefi i mbrojtjes i Mbretërisë së Bashkuar pretendoi se Rusia tashmë e ka “humbur strategjikisht” luftën në Ukrainë dhe tani është një “fuqi më e zvogëluar”.
Kreu i forcave të armatosura të Mbretërisë së Bashkuar, Admirali Sir Tony Radakin tha sot se Rusia po pësonte humbje të mëdha.
Admirali Radakin tha: “Ky është një gabim i tmerrshëm i Rusisë. Rusia nuk do të marrë kurrë kontrollin e Ukrainës.
Ai shtoi: “Rusia ka dobësi sepse po i mbarojnë njerëzit, po i mbarojnë raketat e teknologjisë së lartë.
“Presidenti Putin ka përdorur rreth 25 për qind të fuqisë së ushtrisë së tij për të fituar një sasi të vogël territori dhe 50,000 njerëz, të cilët tanimë janë të vdekur ose të plagosur. Rusia po dështon.”
Në konferencën e fundit të inteligjencës së Ministrisë së Mbrojtjes të Mbretërisë së Bashkuar pretendohej se lufta në Ukrainë kishte “përshpejtuar trajektoren afatgjatë të Rusisë drejt autoritarizmit”.
Ministria e Mbrojtjes shtoi se “skepticizmi për luftën ka të ngjarë të jetë i fortë, veçanërisht në mesin e elitës së biznesit dhe komunitetit oligark të Rusisë”.
