Karim Benzema nuk e ka ndërmend të ndalet.
Sulmuesi francez ishte protagonist tek Real Madridi edhe mbrëmë në ndeshjen e Superkupës së Evropës, ku shënoi gol në fitoren 2:0 ndaj Eintracht Frankfurtit.
Dhe, ky gol ishte mjaft domethënës për veteranin e sulmit, shkruan “Gazeta Express”.
Ai në fakt e kaloi legjendën e Real Madridit, Raul Gonzalez duke u bërë golashënuesi i dytë më i mirë në histori të klubit.
“BigBen” arriti në kuotën e 324 golave me “Los Blancos”, ndërsa ish-sulmuesi spanjoll i kishte realizuar 323 gola.
Vetëm Cristiano Ronaldo me 451 gola është përpara Benzemas në krejt historinë e klubit tmë të suksesshëm në botë.
Edhe pse është 34 vjeç, ish-sulmuesi i Lyonit e ka arritur kulmin e karrierës dhe është i vendosur për të thyer rekorde të reja dhe për të fituar trofe të tjerë me klubin.
Ai po ashtu është favorit absolut për ta fituar Topin e Artë për sivjet pasi e ndihmoi Realin ta fitonte Ligën e Kampionëve dhe La Ligan, plus tash edhe Superkupën e Evropës.
