Me 142 vota pro nga 299 të pranishëm, ndërkohë që duheshin vetëm 120, ligjvënësit grekë votuan të hënën në mbrëmje në favor të krijimit të një komisioni hetimor parlamentar për skandalin e përgjimeve telefonike, pre e të cilave ishte Nikos Androulakis, eurodeputet dhe kreu i partisë socialiste PASOK-KINAL, partia e tretë më e madhe politike në Greqi.
Skandali në fjalë ka sjellë një tërmet politik në vend që ka detyruar kryeministrin Mitsotakis i cili ka marrë nën kontroll Shërbimin Informativ 3 vjet më parë kur erdhi në fuqi, të shkarkojë kreun e Inteligjencës dhe drejtorin e zyrës së tij, njëkohësisht nipi i tij,ndërsa ka pranuar se nuk ishte në dijeni për përgjimin e telefonit të z.Androulakis proces që ishte i ligjshëm, por “politikisht i papranueshëm”, sipas tij.
Kërkesa e socialistëve grekë për komisionin hetimor është miratuar nga të gjithë deputetët e opozitës në parlament , kurse 157 ligjvënësit e partisë qeveritare Demokracia e Re kanë abstenuar.
Sipas tyre zbulimi i arsyes së përgjimit do të shkelte ligjet ekzistuese. Por socialistët grekë dhe partitë e tjera opozitare kanë thënë se ka pikëpyetje të mëdha në këtë çështje që duhet të marrin përgjigje, se duhet bërë me dije përse u përgjua politikani në fjalë, se sa politikanë dhe gazetarë kanë qenë nën vëzhgim dhe se kush vendosi përgjimin e ligjshëm të telefonave dhe përse.
Në një sondazh të fundit 58.3% e të anketuarve kanë deklaruar se skandali i përgjimeve ka dëmtuar besimin e tyre tek qeveria dhe gati dy të tretat e grekëve mendojnë negativisht për qëndrimin e Mitsotakis në këtë çështje, megjithëse 61% vlerësojnë se nuk do to ndikojë mbi votën në zgjedhjet e ardhshme .
Komisioni hetimor parlamentar i përbërë nga 29 deputetë, shumica nga konservatorët në fuqi, fillon punimet të enjten dhe do të hetojë skandalin për gati një muaj.
