Një shkollë në Misuri, SHBA, po kthehet pas në kohë kur bëhet fjalë për disiplinën. Disa studentë në Distriktin Shkollor Cassville do të përballen me ndëshkim trupor – me thupër – në vend të pezullimit.
Mbikëqyrësi i distriktit Dr. Merlyn Johnson tha se politika e re, doli nga një sondazh i prindërve vitin e kaluar. Disiplina, veçanërisht pezullimi i studentëve, ishte në krye të ankesave.
“Ankesat që kemi dëgjuar nga disa nga prindërit tanë janë se ata nuk duan që nxënësit e tyre të pezullohen. Ata duan një opsion tjetër. Dhe kështu, ky ishte vetëm një opsion tjetër që ne mund ta përdornim përpara se të arrijmë në atë pikë pezullimi”, tha Johnson.
Johnson tha se ai nuk e parashikon dënimin me thuper, një praktikë që ishte e ndaluar në distrikt që nga viti 2001, duke u përdorur shpesh. Në vend të kësaj, do të jetë zgjidhja e fundit e ofruar nga administratorët në prani të një punonjësi tjetër të certifikuar.
“Ndëshkimi trupor do të përdoret vetëm kur mjetet e tjera të disiplinës kanë dështuar dhe pastaj vetëm në formë të arsyeshme, kur drejtori e miraton atë”, shpjegoi Johnson.
Prindërit gjithashtu mund të zgjedhin të heqin dorë nga politika në çdo moment gjatë vitit shkollor.
Manuali i Studentëve 2022-2023 i distriktit Cassville e përkufizon ndëshkimin trupor si “përdorimin e forcës fizike si një metodë e korrigjimit të sjelljes së studentëve”. Manuali thotë se do të kufizohet në “të rrahur të pasmet” me një hkop të hollë ose thupër.
Kur u pyet se sa goditje lejohen, Dr. Johnson tha një ose dy për studentët më të rinj dhe deri në tre për studentët më të vjetër. Por ndërsa mbikëqyrësi e karakterizoi politikën e re si një nismë të udhëhequr nga prindërit, të paktën një prind i Cassville ka pyetje në lidhje me qasjen.
“Unë nuk mendoj se është e përshtatshme. E dini, ka shumë fëmijë në distriktin shkollor që nuk kanë prindër që përdorin burimet ashtu siç duhet për fëmijët e tyre dhe ndaj ata duan këtë lloj disiplinimi,” tha Miranda Waltrip, e cila ka tre fëmijë në shkollat e Cassville.
Waltrip ia atribuoi vendimin qëndrimit të komunitetit.
“Cassville, e cila ka një popullsi prej pak më shumë se 3,000 njerëz, është një komunitet vërtet i vogël ku njerëzit janë rritur në një mënyrë të caktuar,” tha Waltrip.
Shqetësimet e Waltrip mbështeten nga ekspertë. Vitin e kaluar, në një analizë nga profesoresha e Universitetit të Teksasit në Austin, Elizabeth Gershoff, thuhej se “zero studime zbuluan se ndëshkimi fizik parashikonte apo përmirësonte sjelljen e fëmijëve me kalimin e kohës./NYpost/M.K/dritare.net
