Mbrëmjen e sotme u zhvillua një ceremoni e veçantë kushtuar përurimit të tekstit të Abetares së Përbashkët Unike për Shqipërinë dhe Kosovën dhe më tej do të përhapet edhe në të gjitha trevat shqiptare.
I pranishëm në këtë ceremoni ishte edhe Kryeministri Edi Rama, i cili në fjalën e mbajtur tha: “Është vërtet një moment shumë i veçantë, për faktin se kjo abetare e parë e unifikuar, ishte një punë e përbashkët mes dy qeverive të Shqipërisë dhe të Kosovës, ishte një sfidë me kohën, pasi hapi vendimtar për t’u nisur në rrugëtimin e realizimit të saj, u hodh jo shumë kohë më parë, në një mbledhje të dy qeverive. Dhe puna e kërkuar nga të dyja skudrat e ngritura enkas për këtë qëllim, nga autorët që konkurruan në një proces, krejt gjithëpërfshirë nga komisioni përzgjedhës, nga shtëpitë botuese që morën përsipër realizimin e saj ishte tejet voluminoze. Por ja, ku jemi sot në vigjilje të vitit të ri shkollor, me një abetare të unifikur, i cili është libër i njëjtë për nxënësit që hyjnë në dyertë e shkollë për herë të parë në Kosovë dhe në Shqipëri.
“Dhe një lajm shumë i mirë është se edhe miqtë e kolegët tanë në Maqedoninë e Veriut e përqafuan këtë ide pak më vonë, sepse ideja fillimisht ishte produkt i mbledhjes së përbashkët të dy qeverive dhe ata sot janë në momentin kur e kanë marrë vendimin për të futur abetaren e unifikuar edhe në klasat ku mësojnë gjuhën amtare fëmijët e popullit shqiptar në Maqedoninë e Veriut.”
Abetarja e përbashkët nisi rrugëtimin e saj në muajin nëntor 2021, në mbledhjen mes qeverisë së Shqipërisë dhe qeverisë Kosovës që u mbajt në Elbasan.Programi i bashkëpunimit ndërmjet dy Ministrive të Arsimit u nënshkrua në dhjetor të 2021, në Prishtinë dhe menjëherë u realizua ngritja e komisionit Shqipëri-Kosovë, që ndoqi procedurat dhe bëri të mundur që sot të kemi abetaren e vetme të përbashkët.
Kjo abetare është krejt ndryshe nga abetarja e mëparshme, në planin e metodave të integrimit të lexim-shkrimit, të cilat intensifikojnë procesin e të mësuarit të lexim-shkrimit.Për herë të parë abetarja unike vjen edhe me një version të përmbajtjes digjitale, që lehtëson punën e mësuesve dhe të prindërve.
