Sipërmarrësi dhe filantropi amerikan, John Paul DeJoria, së bashku me bashkëshorten e tij, modelen, aktoren dhe producenten e njohur, Eloise Broady ndodhen në Tiranë. Ata u pritën edhe nga kryebashkiaku i Tiranës, Erion Veliaj, i cili përmes një statusi në “Twitter”, ka vlerësuar historinë frymëzuese të DeJorias, përshkruar si një shembull i gjallë i ëndrrës amerikane.
“Shumë i lumtur që prita John Paul Dejoria dhe bashkëshorten e tij të mrekullueshme, Eloise Broady! Ai është themelues i “Paul Mitchell Systems” dhe “Patrón Spirits”, i cili nga i pastrehë u bë një filantrop i madh, shembull motivues! Faleminderit për vizitën frymëzuese!”, shkruan Veliaj.
Sipërmarrësi amerikan, John Paul Dejoria është i njohur më së shumti si bashkëthemelues i linjës së produkteve “Paul Mitchell” dhe markës së tekilas “The Patrón Spirits”. Për shkak të karrierës së tij personale dhe arritjeve në biznes, dikur i pastrehë e sot një miliarder dhe sipërmarrës i suksesshëm, DeJoria është përshkruar si një shembull frymëzues edhe në mjaft dokumentarë.
Dejoria, djali i dytë i një babai emigrant italian dhe një nëne emigrante greke, ishte vetëm 2 vjeç kur prindërit e tij u divorcuan. Ai u rrit në një shtëpi fëmije në Los Anxhelos deri në moshën 9-vjeçare, kur filloi të shiste kartat e Krishtlindjeve dhe gazetat me vëllain e tij më të madh për të mbajtur familjen e tij. Shitësi i dikurshëm derë më derë bashkëpunoi me Paul Mitchell në vitin 1980 dhe të dy ndërtuan një nga kompanitë më suksesshme në botë.
