Ish-mbrojtësi legjendar italian, Alesandro Nesta, ka dhënë së fundmi një intervistë special në “Tik Tok”, teksa ndër të tjera është pyetur për “përbindëshin” Erling Haland, i cili është padyshim sulmuesi më në formë i momentit, në arenën e futbollit Europian.
Nesta tregon se si do të ishte përpjekur ta ndalonte norvegjezin, teksa nuk i kursen për sulmuesit e mëdhenj me të cilët është dashur të përballet gjatë gjithë karrierës së tij, duke veçuar Ronaldo Fenomenin. “Ajo që mund të them për Haland është se duhet t’i qëndrosh shumë pranë, nëse i dhuron hapësirë atëherë ke mbaruar dhe bëhet i pandalshëm.
A mund ta ndalja unë Haland? Sigurisht! Nuk duhet të harroni që unë kam luajtur kundër Ronaldo Fenomenit. Haland është shumë i zoti, por Ronaldo ishte ndryshe. Kam luajtur edhe kundër Mesit apo Kristiano Ronaldos, por Ronaldo i Brazilit ishte diçka tjetër. Ishte më i forti nga të gjithë”, deklaroi Nesta.
