Kryeministri Edi Rama ka zhvilluar ditën e sotme një takim me sipërmarrës të përpunimit të vajit të ullirit në qytetin e Beratit. Gjatë fjalës së tij në takim, Rama tha se ka marrë kritika nga një mik i tiji, i cili i ka thënë se duket arrogant kur thotë se në Shqipëri ka më pak korrupsion. Në lidhje me këtë, Rama tha se është i gatshëm të përballet me këdo, në fushën e fakeve dhe jo llafeve.
Ai tha se Berati është një territor që ka më shumë të kthyer sesa njerëz që ikin jashtë. Kjo pasi sipas tij, Berati ofron mundësi të shumta që qytetarët të fitojnë më shumë sesa ata që ndodhen jashtë shtetit.
“E vërteta bëhet copash dhe gëlojnë lloj-lloj thashethemesh, shpeshherë të thuash të vërtetën duket si sfidë. Një miku im po më thoshte: ki pak kujdes se dukesh arrogant kur thua se Shqipëria ka më pak korrupsion. Unë jam i gatshëm të përballem me këto për sa kohë jemi në fushën e fakteve, kur futemi në fushën e llafeve, aty është më vështirë.
Që Berati, falë Ervinit, ka bërë një transformim të madh, nuk e tregon fakti që u bë ministër, por një fakt tjetër: Berati është një territor që ka më shumë të kthyer sesa njerëz që ikin jashtë. Ose kthehen njerëzit? Sepse Berati të gjithëve u ofron mundësinë që, me punë, të vënë në shfrytëzim qoftë shtëpinë e vjetër në kala, qoftë tokën në fshat dhe të fitojnë më shumë sesa për të tjerët jashtë shtetit. Duke folur për oazin e sukseseve, të hidhen përpjetë sa të duan.
Edhe ky është një sukses, i krijimit, shumë vonë jemi, por nuk ka rëndësi. Rëndësi ka që më në fund u krijua një model i bashkimit që bën fuqinë; kur vjen puna në shitje, në prodhim rrini veç. Në shitje, sa më shumë të rrini bashkë, aq më shumë do çoni fitime në shtëpi. Nëse keni 70 e ca dyqane, ku secili shet vajin e vet, jeni më të dobët në shitje. I keni kostot më të larta për të shkuar te blerësi dhe nuk keni kapacitet të negocioni çmime. Ata mund t’jua marrin për një copë bukë” – u shpreh Rama.
