Pa kaluar 24 orë nga miratimi në parlament i ndryshimit të ligjit për dosjet e ish-Sigurimit të Shtetit, socialistët ndërmarrin një hap tjetër për ta çuar përpara atë që e quajnë despiunizim të politikës shqiptare dhe jo vetëm. Këtë duan ta realizojnë përmes dy nismave ligjore. “E para ka të bëjë me ndryshimin e ligjit për integritetin e personave që zgjidhen dhe emërohen në funksione pulitke, ose ligi i dekriminalizimit dhe tjetra për partitë politike. E para parashikon ndalimin e personave për të marrë poste publike nëse vërtetohet lidhje me sigurimin e shtetit. Verifikimi kryhet në bazë të vetë-deklarimit dhe nëse rezulton i pavërtetë përveç humbjes për të qenë në poste publike personi ngarkohet me përgjegjësi penale”, tha Taulant Balla. Siç edhe Top Channel e paralajmëroi në muajin gusht ndryshon edhe ligji për partitë politike. “Nisma e dytë ajo për ndryshimin e në ligjin e partive ka të njëjtën qasje, pra nuk mund të jenë kryetar të Partive në sistemin demokratike ata që kanë qenë bashkëpunëtore të sigurimit”, u shpreh Balla. Këto dy nisma theksoi kreu grupit parlamentar socialist, janë premisat e duhura ligjore që spiunët e regjimit të mos jenë më pjesë e asnjë posti publik.
