Kryeministri i Shqipërisë Edi Rama gjatë një takimi me banorët e Bulqizës vuri theksin në zhvillimin e fshatit. Ai theksoi se fshatrat në Shqipëri janë ndryshe nga ato që paraqiten në televizor apo që dalin nga gojët e disa politikanëve të cilët vetëm shajnë dhe fyejnë.
Sipas tij sot qeveria dhe bashkitë i kanë dhënë një tjetër imazh fshatit.
“Do më lejoni që të përmend këtu disa të dhëna nga zona sepse është vërtetë e jashtëzakonshme puna juaj, dhe janë vërtetë të jashtëzakonshme të dhënat e kësaj zone të cilën askush përveç jush dhe nesh që e kemi për shkak të të detyrës, nuk di gjë.
Po të pyesësh njerëz që nuk jetojnë këtu dhe që nuk kanë lidhje me zonën por që e ndjekin jetën shqiptare dhe ekonominë, punën, fshatin nga televizori me siguri do thonë që në Bulqizë ka vetëm ca skllevër që mbledhin krom nëpër kodra.
Sepse ky është realiteti i televizorit. Fatkeqësisht gjithmonë e më shumë televizori po bëhet vendi ku shpërndahen gënjeshtra, sajesa, manipulime me helm.
Faktikisht në këtë zonë ne kemi 1144 hektarë të mbjellë me drithëra, kemi 136 hektarë me perime, 160 hektarë patate, 34 hektarë fasule, 266 me pemtore, 35 hektar vreshta dhe kemi 146754 rrënjë mollë, kumbull, dardhë, qershi, që zënë një sipërfaqet të konsiderueshme dhe do të investojmë edhe me financimet.
Faktet e Shqipërisë në fshat janë ndryshe nga çfarë njerëzit që nuk e jetojnë fshatin dinë. Për fat të keq gjithë ajo që thuhet jo vetëm që krijon idenë që fshati është në mjerim, por çdokush duhet të informohet dhe të mos përdoret nga dezinformomi, të cilat për fat të keq janë pjesë e të bërit politikë.
Një pjesë e atyre që bëjnë politikë nuk pushojnë se helmuari njerëzit, nuk pushojnë së gënjyeri së shpifuri me fjalë që vetëm na largojnë nga traditat, doket dhe zakonet”, tha Rama.
Ndërkohë kryeministri ftoi bujqit, fermerët dhe blegtorët që të bashkëpunojnë me njëri-tjetrin dhe me bashkitë në mënyrë që prodhimet e tyre të marrin më shumë vlerë.
Ndërsa shtoi se qeveria do të jetë gjithmonë në krahë të njerëzve punëtorë.
“Sa u përket atyre që u thanë këtu, unë besoj se kryetari i Bashkisë meriton të përgëzohet për faktin se është ndër të paktit kryetarë bashkie që ka kuptuar se jo vetëm me reformën territoriale bashkia nuk është vetëm qyteti por i gjithë territori, por edhe se Bashkia në raport me fshatin nuk mund të jetë thjeshtë një autoritet që merret vetëm me rrugë, ujësjellës por duhet të futet më thellë në bashkëpunimin për prodhimin, grumbullimin dhe shitjen e prodhimit.
Edhe ky treg edhe projeket e tjera janë provë e kësaj. Foli dikush për stallat, po ju them që është e gjitha ën dorën tuaj edhe në dorën e bashkisë”, tha Rama.
