Lënia e mandatit të deputetes Grida Duma, për analistin Roland Qafoku, nuk përbën asnjë lajm. I ftuar në Lajmet në Dritare TV, Qafoku tha se zonja Duma, nuk do të kujtohet për asnjë betejë politike, pasi nuk ka bërë asnjë të tillë.
“Nuk u bë hataja se u largua Grida Duma nga PD. Zakonisht dorëheqjet jepen nga detyrat, ministra, kryeministra. Të japësh dorëheqjen nga pozicioni i deputetes në opozitë, nuk është ndonjë gjest i jashtëzakonshëm. Lotët e Açkës apo Gjekmarkajt, ishin të ekzagjeruara. Nga kush iku?
Grida Duma çdo beteje që ka bërë në politikë e ka humbur. Nuk ka fituar asnjë. A ishte Grida Duma një model i mirë në politikë? Unë mendoj që Duma nuk ka krijuar asnjë model, kështu që për mua nuk është aspak e jashtëzakonshme.
Dalja nga politika e këtyre deputetëve të bën të mendosh që po e braktisin anijen sepse ka shumë vrima, por nga ana tjetër ata që nuk japin asgjë, më mirë të ikin. Më mirë Alfred Rushaj dhe Grida Duma të ikur, se sa as mish as peshk. Harruat Grida Dumën disa muaj më parë thatë Lulzim Basha na prij! Sikur t’i thërriste Skënderbeut.
Nuk janë politikanë realë dhe profesionistë. Politikanë realë dhe profesionistë, janë ata që bëjnë beteja. Në beteja mund të humbasësh, mund të fitosh por nëse i humb të gjitha dhe e vetmja vlerë e jotja është se del shumë në ekran, kjo nuk është më vlerë”, u shpreh Qafoku.
