Ish-presidenti amerikan Donald Trump bëri thirrje për përmbysjen e Kushtetutës për të kthyer zgjedhjet e vitit 2020 dhe për ta rivendosur atë në pushtet të shtunën, në vazhdim të mohimit të tij zgjedhor dhe nxitjes së teorive të skajshme të konspiracionit.
“Pse nuk i hidhni poshtë rezultatet e zgjedhjeve presidenciale të vitit 2020 dhe shpallni FITUESIN E DREJTË, apo keni ZGJEDHJE TË REJA? Një mashtrim masiv i këtij lloji dhe përmasash lejon përmbysjen e të gjitha rregullave, rregulloreve dhe neneve, madje edhe atyre që gjenden në Kushtetutë,” shkroi Trump në një postim në rrjetin social Truth Social dhe akuzoi platformat e mëdha të rrjeteve sociale se po punojnë ngushtë me demokratët.
Postimi i Trump erdhi pas publikimit të emaileve të brendshme në Twitter që tregonin diskutime në vitin 2020 mbi një histori të New York Post rreth materialit të gjetur në laptopin e Hunter Biden. Zëdhënësi i Shtëpisë së Bardhë, Andrew Bates, tha të shtunën se komentet e Trump janë “anatemë për shpirtin e kombit tonë dhe duhet të dënohen universalisht”.
“Nuk mund ta duash Amerikën vetëm kur fiton,” tha Bates në një deklaratë. “Kushtetuta Amerikane është një dokument i shenjtë që për mbi 200 vjet ka garantuar se liria dhe shteti i së drejtës mbizotërojnë në vendin tonë të madh. Kushtetuta bashkon popullin amerikan dhe liderët e zgjedhur betohen se do ta mbështesin atë. Është monumenti i fundit për të gjithë amerikanët që kanë dhënë jetën për të mposhtur despotët egoistë që shpërdoruan pushtetin e tyre dhe shkelën të drejtat themelore”, u shpreh ai.
