Mbërritur në Vlorë për koncertin e sotëm në “Petro Marko”, grupi mitik Ricchi e Poveri, Anxhela Brambati dhe Anxhelo Soxhu, janë nderuar paraditen e sotme me titullin “Mirënjohje e qytetit” nga kryebashkiaku Leli.
Titulli me motivacionin:
“Për nderimin që i bëhet Vlorës me koncertin mbrëmjen e sotme,për të gjithë mendimet e lira që i kanë dhuruar Shqipërisë dhe Vlorës posaçërisht si vendi më afër detit, për shijen e muzikës që ata kultivuan dhe për të gjithë nostalgjinë që përmes zërit të tyre do të jetojmë gjithmonë!”
Artistët italianë Anxhela Brambati dhe Anxhelo Soxhu u treguan fjalëpakë por shumë falenderues. Ata premtuan se do të rikthehen përsëri në Vlorë, thjesht do të duhet të zgjedhim ditën, thanë ata. Njëherit kanë falenderuar në shqip. Artistët italianë,janë shoqëruar në vizitën e tyre në bashki nga konsullja e Italisë në Vlorë, Iva Palmieri.
