Beteja për 16 bashkitë veriore

Nga Eduard Zaloshnja

Gjatë kohës që vemendja e publikut të gjerë ka qenë e përqendruar në debatin se kush do ta përfaqësojë zyrtarisht PD-AN në KQZ (si dhe në çeshtjet e ndryshme javore – inceneratorët, McGonigal etj. etj.), në terrenin e 16 bashkive veriore është zhvilluar një beteje fortë, por nën radarin e mediave. Dhe ja përse.
Në territorin e 16 bashkive që shtrihen në veri të Lumit të Tiranës, gara në zgjedhjet e prillit 2021 ishte shumë e fortë mes PS+PSD dhe PD-AN (PD+PDIU+PR+PAA+PBDNJ+LZHK+PDK). Ndryshe ishte puna në 45 bashkitë që shtrihen në jug të Lumit të Tiranës, ku vetëm në Devoll partitë e mazhorancës (PS+PSD) morën në prill 2021 më pak vota se sa PD-AN.
Ndër 16 bashkitë veriore, vetëm në gjashtë prej tyre PS+PSD morën më shumë vota se PD-AN, dhe vetëm në Mat e në Vaun e Dejës morën më shume se gjysmën e totalit të votave atje. Por nga ana tjetër, analiza e rezultateve të prillit 2021 në territorin e 16 bashkive veriore na tregon se votat për LSI-në dhe për partizat e vogla jashtë koalicioneve kanë qenë vendimtare për balancat elektorale në to – vetëm në pesë (Tropojë, Has, Kukës, Kurbin,Kamëz) PD-AN e kaloi kufirin 50% pa ndihmën e LSI-së etj.
Pikërisht për këtë arsye, në terrenin e 16 bashkive veriore është zhvilluar një beteje fortë e heshtur për tërheqjen e politikanëve lokalë të ish-LSI-së dhe të partizave të vogla. Nga ajo betejë e heshtur, publiku ka parë vetëm majën e ajsbergut në Shkodër, ku Agron Çela (një nga 4 deputetët e LSI-së) u bashkua publikisht me PS-në. Në bashki të tjera veriore, ish-politikanë të rëndësishëm lokalë ose i janë bashkuar fushatës së PS-së, ose janë tërhequr mënjanë.
Se sa ndikim do të ketë kjo zhvendosje e politikanëve lokalë të ish-LSI-së mbetet të shihet më 14 maj. Sidoqoftë, një sondazh kombëtar që zhvillova në janar me pothuaj 5700 të anketuar nga i gjithë vendi mund të na japë një ide.
Rreth 1200 të anketuar ishin banorë të rritur të 16 bashkive veriore – jo mjaftueshëm të anketuar për të llogaritur rezultate domethënëse statistikisht për secilën bashki. Sidoqoftë, në tërësi mund të llogariten rezultate përgjithësuese për gjithë zonën veriore.
Kështu, numri i të anketuarve veriorë që ishin të prirur të votonin për kryebashkiakë socialistë ishte pothuaj i barabartë me numrin e të anketuarve veriorë të prirur për të votuar kryebashkiakë opozitarë. Gjë që parashikon probleme më 14 maj për opozitën në bashkitë veriore (përveç Tropojës, Hasit dhe Kukësit, ku PD-AN siguroi mbi 60% të votave, pa ndihmën e LSI-së).