Rezervistët rusë mund të përdorin “lopata” për luftime “dorë më dorë” në Ukrainë për shkak të mungesës së municioneve, thotë Ministria e Mbrojtjes e Mbretërisë së Bashkuar. Në fund të shkurtit, rezervistët përshkruan se u urdhëruan të sulmonin një pozicion ukrainas të armatosur vetëm me armë zjarri dhe lopata, tha ministria.
Lopata e njohur si MPL-50 u projektua në 1869.
“Përdorimi i vazhdueshëm i lopatës si një armë nxjerr në pah luftimet brutale dhe të teknologjisë së ulët që kanë karakterizuar pjesën më të madhe të luftës”, tha ministria.
Një nga rezervistët përshkroi se ishte as fizikisht dhe as psikologjikisht i përgatitur për aksionin. Sipas ministrisë Rusia ka mungesë municionesh.
Ndërkohë forcat ruse duket se kanë siguruar një avantazh të mjaftueshëm pozicional në qytetin e rrethuar të Bakhmut, tha Instituti për Studimin e Luftës (ISW). Bakhmut ka parë muaj luftimesh, ndërsa Rusia përpiqet të marrë kontrollin e qytetit të vogël, ku mbeten rreth 4,000 civilë. Marrja e qytetit do të ishte një sukses i rrallë në fushëbetejë muajt e fundit për Rusinë, por vlera strategjike e qytetit është vënë në pikëpyetje.
Megjithatë, ushtria ukrainase tha të dielën se nuk kishte ndërmend të tërhiqej nga Bakhmut.
Një deklaratë e Shtabit të Përgjithshëm të Forcave të Armatosura pranoi se forcat ruse po përpiqeshin ende të rrethonin qytetin, por tha se më shumë se 100 sulme ishin zmbrapsur në rajonin lindor të Donbasit në 24 orët e fundit.
Mijëra trupa ruse kanë vdekur në përpjekje për të marrë Bakhmutin, i cili kishte një popullsi të paraluftës prej rreth 75,000 banorësh.
