Sali Berisha gjatë prezantimit të kandidatit të tij për Bashkinë Belsh, ka akuzuar sërish kryeministrin Edi Ramës se ka kontraktuar McGonigal për të asgjësuar opozitën. Sipas Berishës, Edi Rama arriti që të merrte peng ish-kryetarin e PD, Lulzim Basha.
Berisha tha se Basha i kishte shkuar në zyrë përpara zgjedhjeve dhe e kishte pyetur nëse duhej të bënin koalicion me Ramën, nëse humbnin, pyetje të cilës i ishte përgjigjur negativisht. “Rama kontraktoi McGonigal për të bërë hetime privatisht dhe e pagoi 225 mijë dollarë kundër PD.
Ish-kryetarit iu hap proces, u dorëzua dhe u mor peng nga Edi Rama. Basha duke mos treguar burimin e parave dhe duke mos patur dokumentet e transferimit të tyre, në çdo vend dënohet për larje parash. Paraja duhet të vijë sipas ligjit. Nga auditi që ka bërë PD, del se përveçse 25 mijë dollarëve, pjesa tjetër prej 700 mijë dollarësh as është future e as ka dalë nga arka e partisë.
Erdhën tek unë dhe më thanë po nuk u fituan këto zgjedhje, a je dakord ti për një koalicion PD dhe PS. Jo i thashë unë, nuk jam dakord. Kjo ishte e mjaftueshme që McGonigalët të më sanksiononin. Dështuan. Ja ku është PD dhe demokratët. Shqiptarët do të fitojnë në 14 maj dhe do e përmbysin këtë regjim.
Çdo demokrati në mbarë Shqipërinë i them se ora e kthjelltësisë dhe integritetin ka ardhur për secilin prej nesh. Nëse kemi të parin qytetarin dhe dinjitetin e tij, nuk duhet të pranojmë kurrë të bëjmë lojën e Ramës. Le ta shndërrojmë ne 14 majin në ditën e triumfit të vlerave në Shqipëri, në ditën e ndryshimit të madh, të çeljes së rrugës për rivendosjen e pluralizmit politik në Shqipëri. Për të kthyer pasuritë e Shqiptarëve në rroga, pensione dhe shërbime për qytetarët”, tha Berisha.
