Përveç “Shtëpisë së Verdhë” në Burrel, edhe Fushë-Kruja përmendej nga Dick Marty si vend ku ushtarët e UÇK-së kishin kryer trafikim organesh.
Në mesin e këtyre akuzave përfshihej edhe shtëpia e Imer Bramës nga fshati Buraj në Fushë Krujë.
Ai në një rrëfim për “Gjurmë Shqiptare” në “Top Channel”, ka treguar se shtëpia e tij asnjëherë nuk ishte lëshuar as për refugjatë. Kjo pasi fshati ishte i largët, pa rrugë e pa rrymë.
“Në vitin 1999 shtëpia sa ishte ndërtuar. Kati i parë ka qenë hangar duhani. Unë e kam përdorur nga viti 1994 deri në 1999 mobilieri, sipër jetojshim. Është punuar mobilieri. Në vitin 1999 këtu kanë qëndruar punëtorë qëkanë punuar. Janë dëshmitë që e pata lidhur energjinë elektrike”, ka thënë ai.
Brama e kishte paditur Dick Martyn pasi e kishte përmendur shtëpinë e tij si vend ku ishte kryer trafik organesh. Megjithatë, padia është rrëzuar pasi Gjykata e Tiranës nuk kishte kompetencë për trajtimin e saj.
“Raportin e Dick Martyt e kam hedhur në gjyq, këtu nuk figuron gjykata. E kam akuzuar për akuzë të rremë dhe ulje morali. E kam kërkuar dëmshpërblim. U mbajtën dy seanca, dhe e hedhi gjykata tha shko në Strasburg se nuk këna kompetencë më tepër”, ka thënë Brama.
