Fushata ka hyrë në kulmin e saj dhe natyrisht polemikat mes palëve sa vijnë e po ndizen. Në një takim electoral, kryebashkiaku Veliaj, ka ironozuar rivalin e tij Belind Këlliçi, duke i përmendur punën e dikurshme si drejtues për rininë në bashkinë e Tiranës, kur atë e drejtonte Lulzim Basha.
“Ky dhëndri ynë që kandidon, ka qenë drejtor te Rinia dhe Kultura. A ju kujtohet evenimenti më i madh kulturor dhe rinor i Bashkisë së Tiranës në ato vite? Ju kujtohet torta e Pavarësisë? Disa prej jush e kujtojnë me turp, se thoni ‘s’më besohet që kam qenë pjesë edhe e asaj administrate’. Ju kujtohet momenti kur iu tha shqiptarëve: ‘Ejani me kova, me legena, me kazanë dhe të kapim nga një copë të tortës’? Kur i dëgjon sot këta të sapllakes, këta të kalit blu dhe këta të legenëve me tortë, ti thua: ‘E pabesueshme’. Sa për të qeshur, siç po qeshim, dhe mirë është të qeshim nga pak, por është edhe për të qarë. Ju kujtohet si ishte Bashkia e Tiranës? E mbushur me graffiti? Një bashki që nuk ruante dot godinën e vet, zyrën e kryetarit të vet, se ndotja fillonte këtu. Ju kujtohet që një pjesë e bashkisë punonte te kontejnerët mbrapa? Tundin kokën ata që e mbajnë mend. Kemi kaluar shumë histori tragjikomike”, u shpreh Veliaj.
Ai tha se sot ekipi i kësaj bashkie meriton ta mbajë kokën lart pasi është bërë pjesë e një transformimi të madh. “Është shumë e rëndësishme që përballë këtij krahasimi grotesk, qesharak, satirik, përballë kësaj tragjikomedie, që ka kaluar Bashkia e Tiranës, sot që i kemi kthyer dinjitetin institucionit, sot që kjo skuadër punon si asnjë skuadër që mund të kem parë në të gjitha bashkitë ku unë kam vizituar, meriton ta ketë kokën lart dhe të vazhdojë përpara me gjithë punët që kemi nisur në Tiranë. Sot dua që me të gjithë punën që kemi nisur me Teknologjinë e Informacionit, ne të jemi një qytet që ecim përpara. Ëndrra ime është që, siç jemi Qyteti Europian i Sportit, kemi qenë i Rinisë, të jemi tashmë Kryeqyteti më i digjitalizuar në Europë dhe sot i kemi të gjitha mundësitë,” tha Veliaj në fjalën e tij.
