Një i dërguar i posaçëm kinez tha të martën se Kina dhe Franca kanë shumë konsensus mbi krizën e Ukrainës dhe të dy palët duhet të shtojnë komunikimin dhe bashkërendimin e ngushtë mbi çështjet kryesore ndërkombëtare dhe pikat e nxehta rajonale.
Li Hui, përfaqësuesi i posaçëm i qeverisë kineze për Çështjet Euraziatike, i tha këto gjatë një takimi me drejtorin e përgjithshëm të Çështjeve të Politikave dhe Sigurisë në Ministrinë e Jashtme franceze Frederic Mondoloni në kryeqytetin e Francës Paris.
Duke vlerësuar vizitën shtetërore të presidentit francez Emmanuel Macron në Kinë në prill, Li u bëri thirrje të dy palëve të zbatojnë konsensusin e rëndësishëm të dy krerëve të shtetit, të thellojnë vazhdimisht bashkëpunimin pragmatik në fusha të ndryshme dhe të vazhdojnë të japin ndihmesë të mëtejshme për paqen, qëndrueshmërinë dhe zhvillimin e botës.
Bazuar në dokumentin prej 12 pikash të Kinës që shpreh qëndrimin e saj mbi zgjidhjen politike të krizës së Ukrainës, pala kineze është e gatshme të forcojë dialogun e komunikimin me të gjitha palët e përfshira për të vazhduar shtimin e mirëkuptimit mbi një zgjidhje politike të krizës, për të krijuar konsensus e për të hedhur një themel të fortë për një armëpushim e përfundim të armiqësive, shtoi ai.Duke vënë në dukje se Franca dhe Kina janë anëtare të përhershme të Këshillit të Sigurimit të Kombeve të Bashkuara, Mondoloni tha se është e rëndësishme që të dy vendet të forcojnë dialogun mbi një gamë të gjerë çështjesh, duke përfshirë krizën e Ukrainës.
Franca i jep rëndësi të madhe vizitës së të dërguarit kinez dhe pret që Pekini të vazhdojë të luajë një rol konstruktiv për arritjen e një armëpushimi dhe përfundimin e armiqësive, theksoi ai, duke shtuar se pala franceze është e gatshme të forcojë dialogun dhe bashkëpunimin me Kinën.
