Emisioni Uniko në Klan Plus ka udhëtuar drejt Italisë për të hedhur dritë mbi vrasjen e 38-vjeçares shqiptare Anila Ruçi, e cila u gjet e masakruar me thikë në banesën e saj në Scaldasole të Pavias në 19 Prill 2023.
Gruaja në foto është pikërisht Anila Ruçi me origjinë nga Elbasani, e cila prej disa vitesh banonte dhe punonte në Itali si kujdestare për të moshuarit.
Ditën që u gjet e vrarë Anila, në banesë me të ishte edhe një 30-vjeçar i identifikuar si Osman Bylyku gjithashtu nga Elbasani. Edhe ky u gjet i plagosur me thikë dhe tashmë është i ndaluar nga policia italiane si autor i dyshuar, edhe pse ai ka mohuar akuzat dhe ka thënë se u sulmuan me thika nga persona të panjohur.
Osman Bylykun, Anila Ruçi e prezantonte si vëlla, por emisioni Uniko ka mësuar se nuk kishin lidhje gjaku mes tyre.
“Prej më shumë se 1 viti Anila jetonte në këtë provincë dhe ishte transferuar në këtë fshat të Pavias nëpërmjet ish-bashkëjetuesit të saj i cili është babai Osman Bylykut. Dhe bëhet fjalë për shtetasin Ahmet Bylyku i cili aktualisht ndodhet në Elbasan”, thotë gazetari Spartak Koka, i cili sqaron se 30-vjeçari Osman Bylyku kishte shkuar në muajt Tetor-Nëntor 2022 në Itali dhe jetonte në të njëjtën shtëpi me Anila Ruçin.
Sipas avokates së Osman Bylykut, ky i fundit nuk ka patur asnjë marrëdhënie intime me 38-vjeçaren Anila Ruçi. Theksojmë se në mediat italiane, të cilat kanë raportuar ngjarjen të parat, ka patur pasaktësi në identitetin e 30-vjeçarit duke e identifikuar si Osman Bilyhun, ndërkohë që gjeneralitetet e sakta janë Osman Bylyku.
