Në takimin me banorët e Goskovës në kuadër të zgjedhjeve vendore të 14 majit, kryebashkiaku Sotiraq Filo ka kërkuar besimin për një tjetër mandat pasi punët e bëra për fshatin do të ecin me ritme më të shpejta. Në fjalën e tij Filo prezantoi projektet e bashkisë për tu ardhur në ndihmë fermerëve me qëllim që fshati të plotësohet me infrastrukturën e duhur brenda mandatit të ri.
“Në fshatin e Goskovës sa i takon ndërhyrjeve në infrastrukturë besoj se kemi bërë nje punë të mirë. Duke filluar nga projekti i ujësjellësit të fshatit që ka qenë një nga kërkesat tuaja të vazhdueshme. Për të vazhduar me ndërhyrje në kanalizime dhe asfaltimin e rrugëve të brendëshme të fshatit. Ndërkohë që presim të përmbyllim ndriçimin publik brenda pak kohësh. Është bërë punë shumë e mirë në projektet në ndihmë të fermerëve me rikonstruksionin e rrugëve të parcelave dhe pastrimin e kanaleve kullues e vaditës. Mendoj se projektet kryesore janë përfundimi i rrjetit të kanalizimeve dhe vijimi i projektit është sistemimi i rrugëve të brendëshme të fshatit. Do kemi mundësi më të mëdha në mandatin e ardhshëm pasi 90% e fondeve tona në infrastrukturë do t’i takojnë fshatit.”
