Kristjan Asllani vlerësohet nga të gjithë si një nga talentët dhe mesfushorët që mund të bëjë diferencën te Interi, por jo nga Inzagi.
Trajneri italian duket se nuk është bindur ende nga cilësitë e mesfushorit shqiptar.
Në ndeshjen ndaj Veronës, Inzagi i dha hapësirë por gjithsesi minutat këtë sezon kanë qenë të pakta për talentin shqiptar.
Vetë legjenda e Interit, Xhuzepe Bergomi u shpreh në një intervistë për “Sky Calcio Club” se Asllani duhet të ketë më shumë hapësirë ndërkohë që ka vlerësuar formën që Interi po kalon kohët e fundit. “Interi po luan qetë edhe në vështirësi. Një muaj më parë, ata mund t’i humbnin këto ndeshje por tani ka ndryshuar dhe kanë durim e qetësi.
Inzagi më pëlqen për kurajon që tregoi duke lënë Korrean në lojë me Lacion dhe Lautaron jashtë. Por, në disa ndeshje duhet edhe të ndryshojë. Për të qenë i freskët në Champions, në ndeshje si ajo me Veronën duhet të aktivizojë të tjerë, si përshembull Asllanin”, u shpreh Bergomi.
