12 Maj, Tiranë- Në Ditën Botërore të Infermierëve, Ministrja e Shëndetësisë dhe Mbrojtjes Sociale, Ogerta Manastirliu, bashkë me Presidenten e Urdhrit të Infermierëve Blerina Duka dhe Kryetaren e Odës së Infermierëve të Kosovës, Nexhmije Gori, kanë marrë pjesë në një ceremoni, ku kanë shpërndarë çertifikatat e mirënjohjes dhe kanë vlerësuar figurën e infermierëve për kontributin e tyre në sistemin shëndetësor publik.
Duke folur për fuqizimin e rolit të infermierit, Ministrja Manastirliu foli për rritjen historike të pagave për infermierët.
“Ne fuqizojmë figurën e profesionistit duke rritur pagat. Jemi krenarë që hartuam një plan, i cili projektoi rritjet e madhe për infermierët tanë, e cila do të realizohet në 2024, ku për të gjithë teknikët e shkencave mjekësore do të ketë një rritje page 150 dollarë dhe kjo rritje page do të bëhet realitet brenda prillit 2024. Gjithashtu për mjekët e përgjithshëm do ketë një rritje me 200 dollarë në muaj brenda prillit të vitit të ardhshëm”,- tha Manastirliu
Ministrja Manastirliu tha se nga viti 2018 janë punësuar me meritokraci dhe transparencë mbi 5 mijë infermierë nëpërmjet portalit “Infermierë për Shqipërinë”.
“Mundësuam që nëpërmjet portalit “Infermierë për Shqipërinë” të kemi një punësim meritokratik, transparent, të drejtë për gjithë teknikët e Shkencave Mjekësore dhe prej fillimit të portalit dhe deri më sot ne kemi punësuar 5 mijë teknikë të Shkencave Mjekësore të cilët sot janë në sistemin publik. Duke përzgjedhur më të mirët kemi më shumë cilësi në shërbimin e ofruar. Aktualisht kemi një listë të pritjes së profesionistëve më shumë se 1900 infermierë, logopedistë, fizioterapeftë, apo teknik të shkencave të tjera mjekësore, të cilët janë pjesë e listës së pritjes së portalit. Vetëm nga janari deri tani që po flasim ne kemi punësuar mbi 550 profesionistë të shkencave teknike mjekësore”,- bëri me dije Manastirliu.
Në Ditën Botërore të Infermierëve u vlerësuan me çertifikata mirënjohje për punën dhe kontributin e tyre: Ekipi i Sallës së Operacionit të Obstetrikës në Maternitetin “Mbretëresha Geraldinë”, Ekipi i Shërbimit të Pneumoftiziatrisë në Spitalin Rajonal Shkodër. Infermiere e vitit u vlerësua Dalina Gorjani nga Shërbimi i Kardiologjisë në QSUT dhe mamí e vitit, Rudi Manosopi nga Materniteti “Mbreteresha Geraldinë”.
