Në një cep të qytezës Kingston upon Thames, ruhet një gur i thjeshtë, por shumë i rëndësishëm për historinë e Mbretërisë së Bashkuar. I shndërruar në një monument, guri rrethohet nga shtatë shtylla dhe sipas legjendës mund të jetë “Guri i Kurorëzimit”.
Afërsia me pallatin e famshëm Hampton Court, që dikur ka qenë rezidenca e mbretit Henry VIII dhe vendi i preferuar i xhirimeve të shumë filmave, e bën qytezën në jugperëndim të Londrës një vend shumë të dashur për turistët. Megjithatë, shumë nuk i kuptojnë ngjarjet e jashtëzakonshme që kanë ndodhur aty.
Kingston upon Thames u emërua si bashkia e parë zyrtare mbretërore e Anglisë. Historiku i qytezës shtrihet deri në shekullin e 10-të, kur Athelstan, mbreti më i shquar sakson, u kurorëzua aty në vitin 925 të e.s. Athelstan konsiderohet si mbreti i parë i Anglisë, pasi mundi aleancën e vikingëve dhe Skocisë në betejën e Brunanburh, duke unifikuar një hartë të Ishujve Britanikë. Kështu Kingston u konsiderua vendi ku filloi Anglia e bashkuar.
Mendohet se si pjesë e ceremonisë, Athelstan u ul në “Gurin e Kurorëzimit”, ndërsa merrte kurorën e tij. Një kopje e kësaj kurore të parë është e ekspozuar në një kishë, dhe është krijuar sipas një ilustrimi të ceremonisë së ndodhur më 4 shtator 925. Gjithashtu, është e mundur që të jetë akti i kurorëzimit të parë të dokumentuar ndonjëherë në Angli. Kingston mbeti vendi i preferuar për kurorëzimet mbretërore.
Aty u kurorëzua mbreti Edredit në 946 dhe Ethelred në 979, si dhe shumë mbretër të tjerë. Megjithatë, nuk ekzistojnë të dhëna të mëtejshme mbi “Gurin e Kurorëzimit” dhe është e paqartë se kur dhe pse guri ndaloi së përdoruri. Por, një traditë ka mbetur: kurorëzimi “ordo”, që do të thotë “urdhri” në latinisht.
Urdhri u përdor në kurorëzimin e Mbretëreshës Elizabeth II në vitin 1953 dhe ka të ngjarë të përdoret edhe në kurorëzimin e ardhshëm të mbretit Charles III.
Me këto lidhje mbretërore të rrënjosura thellë, mbreti George V e quajti zyrtarisht Kingston një bashki mbretërore në vitin 1927. Ndërsa në vitin 1965, mbretëresha Elizabeth do t’i jepte një tjetër Kartë Mbretërore që konfirmonte titullin e Kingston si “Bashkia Mbretërore e Kingston on Thames”.
“Ne jemi jashtëzakonisht krenarë që jemi bashkia mbretërore më e vjetër në vend, ku jo vetëm u kurorëzuan mbretërit e parë saksonë, por është dhe shtëpia e Gurit të Kurorëzimit. Jemi vendi ku filloi Anglia. Me lidhjen tonë të fortë me historinë mbretërore të Britanisë, ne mezi presim për të festuar kurorëzimin e mbretit Charles. Shpirti i komunitetit të Kingston do të jetë padyshim në qendër të festimeve”, shprehet Nicola Nardelli, nënkryetar i Bashkisë Mbretërore të Kingston upon Thames.
