Kryebashkiaku socialist i Kukësit, Safet Gjici ka reaguar pas shoqërimit në Polici të vëllait të tij Lavdrim Gjici dhe shoqëruesit të të tij Qerim Halili, të cilët u denoncuan nga dy banorët e fshatit Bushat, Bedri dhe Nebi Sinamati për presion dhe dhunë deri në nxjerrjen e armës së zjarrit dhe për blerje votash.
Në një prononcim për mediat, Gjici thotë se personat që kanë qenë me makinën tip “G Class” nuk kanë blerë vota, por janë në kontroll të territorit. Kjo sepse sipas tij, partia e “Non Gratave” po blen vota.
“Video kishte pamje që njerëzit tonë dalin në terren për të kontrolluar furgonin e bandës që blejnë vota ditë për diell, janë turrë si hiena në çdo njësi administrative vetëm për të blerë vota dhe për të bërë presione, video tregohet qartë që s’ka as armë as para.
Ne jemi në kontroll, kontrollojmë territorin nga bandat dhe furgoni i bandave që i ka rreth kandidati i Non Gratave. Të bllokohen të gjitha makinat me targa të huaja dhe me xhama të zeza që lëvizin në territor. Kemi prova dhe video dhe do i çojmë në organet ligjzbatuese”, tha Gjici.
