Një grup deputetësh të opozitës janë bërë bashkë për të ndryshuar përbërjen e komisionit të reformës zgjedhore. Gazment Bardhi deklaroi nga Kukësi se Partia Demokratike ka vendosur të shkarkojë nga posti i bashkëkryetarit të këtij komisionit Enkelejd Alibeajn, i cili është sot Sekretar i Përgjithshëm i PD dhe në vend të tij do të jetë Oerd Bylykbashi, i cili është nënkryetar i foltores që drejtohet nga Sali Berisha.
“Për Grupin Parlamentar të PD-së, është e papranueshme që në dy vjet, Komisioni i Reformës Zgjedhore nuk ka prodhuar asnjë rezultat. Lënia pa rezultat e Komisionit të Reformës Zgjedhore, në gjykimin tonë, ka favorizuar vijimin e manipulimit të zgjedhjeve nga regjimi i Edi Ramës.”, tha Bardhi
Bardhi ka propozuar që pjesë e komisionit të jenë edhe aleatët Mediu e Idrizi, por bie në sy se në këtë listë nuk është përfshirë asnjë deputet që mbështet Lulzim Bashën. Por në situatën ku është përfshirë Partia Demokratike, mbetet për tu parë nëse këto ndryshime do të pranohen apo jo nga mazhoranca socialiste në parlament.
“Bëhet fjalë se kush përfaqëson PD, në rastin konkret jemi ne që i caktojmë. Ne nuk i ndërhyjmë PS se kush do të jetë bashkëkryetari i PS dhe besoj nuk ka ardhur dita që Rama të caktojë kush na përfaqëson ne.”
Prej 4 shtatorit Partia Demokratike është përfshirë në një debat të ri nëse kryetar i grupit parlamentar të PD është Gazment Bardhi apo Lulzim Basha. Deri më tani kryetarja e kuvendit Lindita Nikolla nuk ka një qëndrim përfundimtar nëse parlamenti njeh Bashën apo Bardhin.
Kjo çështje pritet të qartësohet të enjten, kur kuvendi do të shtyjë me 6 muaj afatin e komisionit të posaçëm për reformën zgjedhore.
Në këtë séancë do të shihet nëse kuvendi do të pranojë kërkesën e Gazment Bardhit apo do të njohë Lulzim Bashën si kryetar të grupit parlamentar e do të mbajë Enkelejd Alibeajn si bashkëkryetar të komisionit.
