Futbollisti i Shënkollit (kapiteni i skuadrës), Bledar Zefi ka përfunduar në pranga nga Policia e Lezhës pas episodit të shëmtuar gjatë takimit me Sopotin (Kategoria e Dytë). Zefi goditi me grusht gjyqtarin Aburraman Kadriu, me këtë të fundit që iu desh të merrte mjekim ne Spitalin rajonal Lezhë.
Njoftimi:
Lezhë/ Dhunoi fizikisht arbitrin gjatë zhvillimit të ndeshjes së futbollit midis ekipeve “KF Shënkolli”-“KF Sopoti”, vihet në pranga 31-vjeçari, futbollist i ekipit “KF Shënkolli”.
Specialistët për Hetimin e Krimeve në Komisariatin e Policisë Lezhë, kanë arrestuar në flagrancë shtetasin B. Z. 31 vjeç, banues në Lezhë, futbollist i ekipit “KF Shënkolli”, për veprën penale “Goditje për shkak të detyrës”.
31-vjeçari, ditën e sotme, gjatë zhvillimit të ndeshjes së futbollit midis ekipeve “KF Shënkolli”-“KF Sopoti”, në stadiumin e Shënkollit, ka dhunuar fizikisht arbitrin e ndeshjes, shtetasin A. K., 34 vjeç, banues në Tiranë, i cili aktualisht ndodhet në spital për asistencën e nevojshme mjekësore.
Materialet procedurale iu referuan Prokurorisë, për veprime të mëtejshme.
