Jozefina Topalli është bërë më aktive pas masës së caktuar të sigurisë ‘detyrim paraqitjeje’ dhe “ndalim i daljes jashtë shtetit” ndaj Sali Berishës për akuzën ‘korrupsion pasiv’ në çështjen e privatizimit të kompleksit ‘Partizani’.
Topalli i ka konsideruar politike, veprimet e SPAK ndaj Berishës. Në një intervistë për Euronews Albania, Topalli theklsoi se po shkelet Kushtetuta, gjë e cila sipas saj nuk ka ndodhur në 30 vitet e fundit. Sipas saj nuk ka asnjë provë që Berisha është i përfshirë në këtë dosje.
“Ngjarjet e fundit janë politike më shumë se sa juridike. Nëse ka një proces politik ndaj kryetarit të opozitës dhe një proces që fillon me shkeljen e Kushtetutës për të marrë autorizimin e Kuvendit, sigurisht që kjo është një alarm për opozitën dhe pluralizmin në tërësi.
Në tre dekada nuk ka ndodhur asnjëherë që të mos zbatohet Kushtetuta në raport me atë që është garancia e çdo deputeti.
Në fakt imuniteti është garanci për opozitën. Është garanci që ai të jetë i përfshirë në debate politike dhe të ketë kurajon për të thënë gjëra të rëndësishme dhe të mos ketë frikë nga kundërshtarë që përmes kërcënimit ta pengojnë ata që të bëjë detyrën për të cilën është zgjedhur.
Nga ana tjetër nuk kemi parë asnjë provë. Akuza kryesore qëndron se kryetari i opozitës ka ndryshuar ligjin për pronat, gjë që ka qenë programi i tij politik për të cilën është miratuar. As në kohën e Enver Hoxhës kjo nuk ka ndodhur”-tha ajo.
