20 shtetas shqiptarë kanë udhëtuar mëngjesin e së enjtes nga Izraeli për në Greqi përmes një fluturimi të linjave ajrore greke, të koordinuar nga Ministria për Evropën dhe Punët e Jashtme.
Pasi kanë mbërritur në Athinë, 17 prej tyre janë nisur drejt Shqipërisë në rrugë tokësore dhe po transportohen për në qytetet ku ata jetojnë dhe banojnë, si: Tirana, Gjirokastra, Korça dhe Vlora, nën kujdesin e MEPJ.
Ministria për Evropën dhe Punët e Jashtme është në kontakt të vazhdueshëm me të gjitha Ambasadat edhe me ministritë e vendeve të tjera të rajonit për t’i ardhur në ndihmë të gjithë qytetarëve që kërkojnë të kthehen në vendet e tyre.
Kujtojmë që pak ditë më parë erdhën përmes një fluturimi të organizuar nga Mali i Zi edhe 11 shtetas të tjerë shqiptarë, të cilët u larguan nga Izraeli pas sulmit të befasishëm të nisur nga Hamasi.
