Reperi me famë botërore, Drake ka publikuar videoklipin e këngës më të re, të shkëputur nga albumi me titull “For All The Dogs”, në të cilën përmend edhe Prishtinën.
E titulluar “Polar Opposites”, kënga eksploron temat e konfuzionit, mospërputhjes dhe paqëndrueshmërisë emocionale të këngëtarit amerikan në një marrëdhënie romantike me një vajzë të quajtur Mariana. Ndërsa në vargje flitet edhe për propagandë, tensione edhe kryeqytetin e Kosovës. Kënga iu prezantua fillimisht publikut si audio gjatë tensioneve të veri të Kosovës, ndërsa dy orë më parë është publikuar edhe videoklipi.
Në një vëzhgim të thjesht, ajo çka bie në sy janë motivet e përdorura nga reperi amerikan në klipin e këngës; pikërisht xhaketa e kuqe me shqiponjën e zezë në shpinë. Ndërsa klipi publikohet në një moment tepër të veçantë për shqiptarët, festat e nëntorit – me datën 29 që shënon Ditën e Çlirimit të Shqipërisë.
“Ti më vendos kufizime. Pse trajtohem ndryshe? Dielli po perëndon në Atlantik, vë bast se do të shfaqet një hënë e plotë. Pyes veten se çfarë tronditi varkën tënde. Çfarë e mban zemrën tënde të rëndë duke lundruar; Nuk e di, nuk e di”– thuhen në vargjet e këngës.
“Ose është mesazhi yt që po e lexoj gabim; Ose thjesht veprimet tuaja janë mashtruese; Nuk e di se si i bëjnë gjërat në Prishtinë; E di që tensioni po rritet; Ka shumë njerëz të vdekur për mua që ende marrin frymë”, thotë mes të tjerash në vargjet e këngës reperi kanadez. Referenca për Prishtinën mund të tregojë dallime kulturore ose mosnjohje se si bëhen gjërat në atë vend, duke kontribuar më tej në tension.
Nuk dihet se prej nga ka ardhur frymëzimi i reperit për të përmendur kryeqytetin e Kosovës në këngën e tij, megjithatë mund të jetë influencuar edhe nga këngëtarja shqiptare me famë ndërkombëtare, Rita Ora, me të cilën ruan një miqësi prej kohësh.
