Një grindje diplomatike ka shpërthyer mes qeverisë britanike dhe asaj greke për të ashtuquajturat skulpturat e Partenonit apo Mermeret Elgin, sipas BBC.
Kryeministri grek Kyriakos Mitsotakis do të takohej me Rishi Sunak në Londër, por ky i fundit e anuloi në minutën e fundit.
Një zëdhënës i kryeministrit grek tha për BBC se ishte “i zhgënjyer” që takimi ishte anuluar.
Edhe qeveria britanike konfirmoi se takimi ishte anuluar.
Cili do të jetë fati i skulpturave të Partenonit?
Anulimi erdhi një ditë pasi Mitsotakis i tha Laura Kuenssberg të BBC-së se mermerët duhet të kthehen.
Një zëdhënës i zyrës së kryeministrit grek tha për BBC se “kryeministri është i zhgënjyer që kryeministri Sunak anuloi takimin e tyre dypalësh”.
”Greqia dhe Britania kanë një histori shumë të thellë miqësie dhe bashkëpunimi dhe qeveria greke është jashtëzakonisht e befasuar nga ky vendim. Kryeministri priste me padurim të diskutonte një sërë temash me interes të ndërsjellë, duke përfshirë konfliktin Izrael-Gaza, pushtimin e paligjshëm të Rusisë në Ukrainë, ndryshimet klimatike, si dhe sfidat e përbashkëta si migrimi, dhe sigurisht skulpturat e Partenonit”, tha ai.
Burimet thanë se Mitsotakis ishte “i hutuar” dhe “i mërzitur”. Takimi do të bëhej nesër në drekë dhe do të zgjaste 45 minuta. Por, paraqitja e Mitsotakis në programin e BBC-së të dielën me Laura Kuenssberg kishte acaruar Rishi Sunak.
Kryeministri grek tha se Mermeret Elgin duhet të kthehen pasi të kesh disa nga artefaktet në Londër dhe pjesa tjetër në Athinë është si të presësh përgjysmë Mona Lizën.
Mermeret, të njohura edhe si Skulpturat e Partenonit, janë thesare të lashta greke në Muzeun Britanik të sjellë në MB nga diplomati britanik Lord Elgin në fillim të shekullit XIX.
Qeveria britanike konfirmoi anulimin dhe tha se zëvendëskryeministri do të takohej me kryeministrin grek.
Një burim i lartë konservator tha se “u bë e pamundur që ky takim të vazhdonte pas komenteve në lidhje me mermerët Elgin para tij”.
“Qëndrimi ynë është i qartë. Mermeret Elgin janë pjesë e koleksionit të përhershëm të Muzeut Britanik. Është e pamatur që çdo politikan britanik të sugjerojë se kjo është subjekt i negociatave”, shtoi ai.
Mitsotakis u takua më herët me liderin laburist Keir Starmer.
