Nga Mero Baze/
Ka diçka të pazakontë në gjithë mënyrën se si Berisha po e pret vendimin e Gjykatës për arrest me burg në shtëpi, deri 24 orë para marrjes së vendimit.
E gjithë retorika e tij dhe inskenimi i dialogut që bën me publikun, përqendrohet tek fakti që “ai nuk e lëshon PD”, që “ai do ta drejtojë atë dhe nga qelia më e thellë”, që “ai do të jetë deri në vdekje kryetari i partisë”, që “familja e tij ka të drejtë të jetë trashëgimtare e partisë”, që “asgjë nuk e ndal atë nga të qenit kryetar” etj. Pra 24 orë para një vendimi të rëndësishëm në jetën e tij fizike dhe politike, shqetësimi i tij, madje përbetimi i tij, është që nuk do ta lëshojë karrigen.
Zakonisht një politikan i rëndësishëm, por dhe një njeri i zakonshëm, para vendimesh të tilla ka një qasje më normale për të ardhmen. Është normale të kundërshtojë vendimin, është normale madje dhe ta refuzojë zbatimin e tij, është normale ta pranojë dhe të reflektojë mbi çfarë ka ndodhur, por është anormale që të vetmin hall që ka, është se mos i merr njeri karrigen e pushtetit që mban me dhunë prej 33 vjetësh.
Do të mjaftonte vetëm kjo fotografi e Sali Berishës 24 orë para arrestimit të tij, për të kuptuar se çfarë ka qenë motiv i jetës së tij dhe çfarë ka të shtrenjtë në këtë jetë ai njeri. Sot ai tregon në të vërtetë se përse ka qenë në politikë, përse ka zaptuar PD qysh më 1991, duke zbuar fillimisht Azem Hajdajrin e më pas të gjithë me radhë nga Neritan Ceka i pari e tek Lulzim Basha i fundit.
Kjo qasje e tij tregon pse ai për atë karrige dogji Shqipërinë më 1997, ju kundërvu instiucioneve të shtetit më 2008 kur i biri varrosi 26 vetë të gjallë për të vjedhur në Gërdec dhe pse ishte gati të shkatërronte Shqipërinë vetëm për të mbrojtur krimin e 21 janarit, i cili ia afroi makthin e rrëmbimit të karriges tek dritarja e zyrës. Kjo qasje e tij tregon pse ai u bë armik i madh i SHBA, Britanisë së Madhe dhe botës perëndimore për hallin e tij.
Mënyra se si ai po mbrohet dhe po përbetohet 24 orë para arrestimit, është një koncentrat i jetës së tij 33 vjeçare në politikë, është një fotografi reale, një autoportret i tij, për çfarë ideali ka hyrë në politikë dhe përse këmbëngul të rrijë deri në vdekje. Për atë karrige! Ndaj mos pyesni se çdo të ndodhë kur të arrestohet ai. Bashkë me të do të jetë në arrest shtëpie dhe partia e tij. E pastaj në varr bashkë me të.
Shpresa për një opozitë të re, nuk është brenda atyre mureve apo varrit të tij të ardhshëm. Aty do të mbetet “mumja” e balsamosur e ish- PD. “Krishti” i ri i opozitës nuk do të lindë kurrë brenda atyre mureve. Nëse do të lindë!
