Nëse Kosova nuk përmbush detyrimet rrezikon që të kjetë një pako të re ndëshkuese nga Bashkimi Europian. Paralajmërimi erdhi nga nënkryetari i LDK-së, Lutfi Haziri, në studion e Ditarit në A2 CNN, sipas të cilit problemi kryesor është situata në veri të Mitrovicës.
“Nëse vazhdon ky ngërç në dialog dhe nëse qeveria nuk zbaton obligimet e marrëveshjes së 28 shkurtit 2023 në Bruksel, atëherë implementimi po ndodh dhe obligimet që ka Kurti bën që Kosova të jetë në masa ndëshkuese dhe problemi i është deeskalimi në pjesën veriore të Mitrovicës që lidhet me 4 komunat. Sipas tij qeveria Kurti nuk po ndërmerr asnjë hap për normalizimin e situatës dhe për përmbushjen e detyrimeve, teksa i bëri apel politikës që të të veprojë.
“Nuk ka ndodh asnjë hap për depërshkallëzimin apo për të pezulluar masat ndëshkuese. Kjo është vendosur nga shumica e shteteve jo vetëm veto e Hungarisë, por Prishtina duhet të lëvizë. Obligimi kryesor është depërshkallëzimi i gjendjes në 4 komuna të Mitrovicës që nuk nënkupton zgjedhje të lira, krijim i ambientit të qëndrueshëm politik dhe të sigurisë, dhe duhet të përfundojë bojkoti i zyrtarëve policorë e të shëndetësisë apo një zgjidhje alternative”. Ai tha se Serbia nuk do të shpëtojë pa masa ndëshkuese pasi, sipas tij është sponsorizuese dhe strehuese e terrorizmit.
“Serbia nuk është vetëm sponsor i terrorizimi, por edhe shtet strehues i terrorizmit. Por Serbia nuk mund të shpëtojë pa masa ndëshkuese. Qeveria e Kosovës ta nxjerrë Serbinë në dritë të ngjarjeve, se Serbia në fund të çdo procesi politik largohet nga tavolina dhe është qëllimi ynë të mbyllim detyrimet tona pa lënduar parimet e negociatave”.
I pyetur nëse është e bashkuar opozita në Kosovë, pas takimit të LDK-së me presidenten Osmani, ndërkohë që partitë e tjera opozitare nuk morën pjesë Haziri u përgjigj: Pozita dhe opozita në dialog kanë një konsensus, mandatin e negociatorit ia njeh kryeministrit, por nuk kemi dialog të brendshëm. Ftesës së presidentes i jemi përgjigjur dhe kemi dëgjuar sikurse dhe ftesës së kryeministrit për çështjet e dialogut dhe jo për çështje të tjera. Kurti e ka përjashtuar opozitën dhe shoqërinë civile në vendimmarrje. Gjithçka që ka njoftuar për dialogun nuk ka arritur ta bëjë pjesë”.
