Federata Shqiptare e Futbollit bëri dje me dije se Kombëtarja do luajë një test miqesor me Suedinë në Stockholm më 25 mars. Dueli i “Friends Arena” vjen si përgatitje e finaleve të Euro 2024 që do mbahet në Gjermani nga 14 qershori – 14 korrik të këtij viti.
Veç sfidës me Suedinë, në FSHF po diskutojnë detajet e fundit edhe me një tjetër kundërshtar, po për muajin mars dhe bëhet fjalë për datën 18 ose 19 të atij muaji.
Fjala është për Kilin, kombëtaren nga Amerika Latine. Një miqësore e tillë do ishte e para për tanët, që duket se kanë gjetur akordin. Në Kili kanë prezantuar trajnerin e ri dhe Ricardo Gareca do marrë një duel miqësor që do zhvillohet në Itali. Qyteti dhe data ende nuk janë dakordësuar, teksa një lajm të tillë e konfirmoi për mediet kreu i Federatës së Futbollit të Kilit, Pablo Milad.
“Po rregullojmë detajet me Shqipërinë, do të luhet në Itali. Nuk është ende përfundimtare, por është një përqindje shumë e lartë. Ne jemi duke përpunuar detajet, duke përcaktuar se në cilin qytet do të luajmë në Itali, por negociatat janë avancuar”, u shpreh Pablo Milad.
Kili do të luajë kundër Francës më 26 mars një takim miqësor dhe para tij kërkon një tjetër sfidë. Kujtojmë se kuqezinjtë e Sylvinhos janë shortuar në grupin B të Euro 2024 dhe kanë si kundërshtar Spanjën, Italinë dhe Kroacinë.
