Autoriteti Rrugor Shqiptar, ARRSH përmes një njoftimi në llogarinë e tij në “Facebook” ka bërë më dije bllokimin e një rruge për shkak të punimeve të linjës hekurudhore Tiranë-Durrës. Bëhet fjalë për rrugën në km 4+762, segmenti ku lidhet rruga e vjetër e Durrësit me hekurudhën e Rashbullit e cila do të bllokohet mbrëmjen e sotme deri nesër në mëngjes.
Bllokimi do të nisë sonte në orën 22:00 deri nesër në orën 05:00 të mëngjesit. Më tej në njoftim bëhet me dije se automjetet do të orientohen të kalojnë në autostradën Tiranë-Durrës.
Njoftimi i plotë:
Në vijim të punimeve që po kryhen në projektin “Rikonstruksioni i linjës hekurudhore Durrës-Tiranë Terminali Publik i Transportit (TPT) dhe i linjës së re hekurudhore për në aeroportin ndërkombëtar të Rinasit (ANR)”, do të bëhet bllokim i Trafikut Rrugor në km 4+762, segmenti ku lidhet rruga e vjetër e Durrësit me hekurudhën në Rashbull. Mjetet do të orientohen të kalojnë në autostradën Tiranë-Durrës. Për të mos bllokuar qarkullimin e mjeteve gjatë ditës, bllokimi do të fillojë sot natën në orën 22:00, deri në orën 05:00 të mëngjesit. Kompania zbatuese në bashkëpunim me ARRSH dhe Policinë Rrugore kanë marrë të gjitha masat për menaxhimin e trafikut. Kërkojmë mirëkuptimin e drejtuesve të mjeteve dhe banorëve të zonës për këtë ndërhyrje.
