Izraeli po shton sulmet e tij ajrore ditën e sotme në Rafah, pavarësisht protestave ndërkombëtare për bombardimet vdekjeprurëse të një kampi të mbushur me njerëz të zhvendosurve në qytet, që çoi në një takim urgjent të Këshillit të Sigurimit të OKB-së për të diskutuar situatën në atë sektor të Rripit të Gazës.
Ndërkohë Spanja, Norvegjia dhe Irlanda do të njohin zyrtarisht shtetin palestinez sot, gjatë një konference për shtyp në Bruksel, siç njoftuan javën e kaluar, duke shkaktuar një reagim të zemëruar nga qeveria izraelite.
Në terren, ekipet e AFP në qytet raportuan në orët e hershme të mëngjesit se bombardimet e reja ishin nisur në Rafah qendrore dhe perëndimore, në skajin jugor të Rripit të Gazës, ku ushtria izraelite ka kryer operacione tokësore që nga fillimi i majit.
Sulmet e reja ajrore erdhën në mes të protestave ndërkombëtare dhe dënimit të bombardimit të një kampi të personave të zhvendosur të dielën mbrëma, i cili vrau 45 njerëz dhe plagosi 249 të tjerë, sipas ministrisë së shëndetësisë së Gazës. Kryeministri izraelit Benjamin Netanyahu e quajti bombardimin një “aksident tragjik” .
Ushtria izraelite tha se po hetonte vdekjen e civilëve pasi fillimisht tha se kishte shënjestruar dy komandantë të Hamasit me “municione precize”.
“E indinjuar”, qeveria amerikane i bëri thirrje aleatit të saj Izraelit që të marrë të gjitha masat për të mbrojtur civilët, diplomacia kanadeze shprehu “tmerrin”, presidenti francez Emmanuel Macron “indinjatë”.
Rreth 10,000 njerëz u mblodhën pranë ambasadës izraelite në kryeqytetin francez për të denoncuar bombardimin. Turma mbante flamuj palestinezë dhe pankarta që lexonin slogane të tilla si “mos vrisni një fëmijë, as izraelit dhe as palestinez”, “Ndaloni bombardimet, liri për Palestinën”, “Ne jemi fëmijët e Rafës”, “Rafa, Gaza. , ne jemi me ju” e kështu me radhë.
“Dënoj veprimet e Izraelit që vranë dhjetëra civilë të pafajshëm, të cilët vetëm kërkuan të mbroheshin nga kjo luftë vrastare. Nuk ka vend të sigurt në Gaza. Ky tmerr duhet të ndalet”, tha Sekretari i Përgjithshëm i OKB-së, Antonio Guterres .
“Të thuash se ishte një “gabim” nuk do të thotë asgjë për ata që u vranë, për ata që vajtojnë, për ata që po përpiqen të shpëtojnë jetë,” tha nënsekretari i përgjithshëm i OKB-së për Çështjet Humanitare, Martin Griffiths.
Këshilli i Sigurimit i OKB-së u mblodh për një takim urgjent këtë pasdite (me orën e Nju Jorkut), thanë burimet diplomatike.
Takimi urgjent, me dyer të mbyllura, u thirr me kërkesë të Algjerisë, një anëtare jo e përhershme e Këshillit të Sigurimit që përfaqëson vendet arabe, dhe u mbështet nga Sllovenia, shpjeguan burimet.
OKB-ja ka bërë thirrje për një hetim “të plotë dhe transparent” për bombardimin e kampit Rafah.
Mbrojtja Civile Palestineze raportoi disa trupa “të djegur” në zjarrin që përfshiu kampin e personave të zhvendosur në Barkasat, i drejtuar nga UNRËA, në veriperëndim të Rafahut.
“Ne pamë trupa të djegur, të copëtuar (…) të gjymtuar, fëmijë, gra dhe të moshuar”, të cilët u plagosën, tha Mohammed al-Mughir, një punonjës i Mbrojtjes Civile në Rripin e Gazës. ‘Ferri në tokë’
