Finalja e Athinës mes Olympiakos dhe Fiorentinës dërgoi zyrtarisht në pension Conference League “e vjetër”. Edhe turneu i tretë evropian për klube, si Champions League dhe Europa League, do të ndryshojë strukturë duke filluar nga sezoni 2024/25:
format i ri me një grup të vetëm prej 36 skuadrash me 6 ndeshje të garantuara, rritje të të ardhurave për klubet pjesëmarrëse dhe gjithashtu një emër i ri, i cili do të kalojë nga UEFA Europa Conference League në UEFA Conference League.
Formati i ri
Pas vetëm tre sezoneve që nga debutimi i tij në skenën evropiane, turneu do t’i japë lamtumirë fazës së grupeve, pikërisht siç do të ndodhë për dy turnetë kryesore: formati i ri do të përfshijë një grup të vetëm dhe pjesëmarrjen e 36 skuadrave (deri tani ishin 32). Ndryshe nga sa do të ndodhë në Champions League dhe Europa League, megjithatë, numri i ndeshjeve të luajtura në fazën e parë nuk do të rritet.
Çdo ekip do të luajë nga gjashtë, të gjitha kundër kundërshtarëve të ndryshëm, tre në shtëpi dhe tre jashtë. Nuk do të ketë më kryqëzime me skuadrat e Europa League, pasi nuk ka më asnjë “rënie” nga një turne në tjetrin.
Tetë kualifikueset më të mira do të kalojnë direkt në fazën e 16-të, ndërsa skuadrat nga vendi i 9-të deri në vendin e 24-të do të garojnë në ‘play-off’, pikërisht siç do të ndodhë në dy garat e tjera.
Falë ndeshjeve më të pakta të planifikuara në fazën e parë, skuadrat që luajnë në Conference League nuk do të dalin në fushë në janar. Faza e parë do të zgjasë nga data 3/10 deri më 19/12: dita e fundit do të jetë në një javë kushtuar “ekskluzivisht” Konferencës, me ndeshjet e planifikuara ende për të enjten.
Emri i ri
Emri i turneut do të ndryshojë gjithashtu: nga UEFA Europa Conference League në UEFA Conference League. Një risi që u shpjegua kështu nga UEFA: “Kërkimet mes tifozëve dhe partnerëve tregtarë kanë zbuluar se heqja e ‘Europa’ nga emri i garës do të lejojë zhvillimin e mëtejshëm si një garë më vete.”
Të ardhura më tepër për ekipet
UEFA ka vendosur të ndajë 285 milionë euro në sezon çmime për tre vitet e ardhshme, me një rritje prej 50 milionë, krahasuar me ciklin e kaluar që sapo ka përfunduar.
Këto, në detaje, janë mënyrat se si do të ndahet shuma në dispozicion:
– 40% do të ndahen për tarifat e regjistrimit: 114 milionë euro.
– 40% do të ndahet për shumat fikse të lidhura me performancën: 114 milionë euro.
– 20% do t’i caktohet formës së re të sapo krijuar nga UEFA, e cila zëvendëson grupin e tregut dhe renditjen historike: 57 milionë euro.
