Një mashtrim prej 108 mijë eurosh është zbuluar në Tiranë. Një 32-vjeçar, i identifikuar nga Policia e Shtetit si Klevis Berberi i ka marrë një 54-vjeçarje shumën prej 108 000 euro duke i falsifikuar deklaratën noteriale të bankës. Pasi prona u ble nga 54-vjeçarja, Berberi duke përdorur deklaratën noteriale që i ishte lënë në dorëzim e ka shitur pronën edhe pse ka qenë një kolateral për të marrë kredi në një bankë të nivelit të dytë.
NJOFTIMI I POLICISË:
Tiranë
Specialistët e Sektorit për Hetimin e Krimit Ekonomik e Financiar, në drejtimin e Prokurorisë Pranë Gjykatës së Shkallës së Parë të Juridiksionit të Përgjithshëm Tiranë, finalizuan operacionin “Banker”. Në kuadër të këtij operacioni u ndalua me iniciativë shtetasi K. B., 32 vjeç, banues në Tiranë, për veprat penale “Falsifikimi i vulave, i stampave ose i formularëve”, “Mashtrimi” me pasoja të rënda, dhe “Shpërdorimi i detyrës”.
32-vjeçari, nëpërmjet mashtrimit, duke shpërdoruar detyrën, i ka marrë shumën prej 108 000 euro shtetases F. M., 54 vjeçe, duke falsifikuar deklaratën noteriale të bankës me qëllim përvetësimin e kësaj shume dhe të pronës që do të blihej nga ajo. Pasi është nënshkruar akti notarial për blerjen e pronës, shtetasja F. M., duhet të ishte pronare e vetme e kësaj prone, ndërkohë që shtetasi K. B., ka shitur pronën që ka qenë e vendosur kolateral për llogari të një banke të nivelit të dytë. Materialet i kaluan Prokurorisë për veprime të mëtejshme.
