Qyteti i Shkodrës do të presë këtë fundjavë festivalin “Retro”, ku do të ekspozohen mjetet klasike të viteve ’60-‘70-’80, me targa të personalizuara.
Ministrja e Shtetit për Marrëdhëniet e Parlamentit, Elisa Spiropali dhe kryetari i bashkisë së Shkodrës ftojnë qytetarët të vizitojnë makinat Retro, parada e të cilave është një vlerë e shtuar për sezonin turistik.
“Sot n’Shkodër që këtë fundjavë mirëpret Andrra n’Retro. Bashkohuni me ne për të shijuar atmosferën magjike që do të ofrojë ekspozita e mjeteve Retro në sheshin përpara bashkisë më 22-23 qershor dhe për të krijuar kujtime të veçanta”, tha Spiropali në një postim në rrjetet sociale.
Përveç paradës së automjeteve “Retro”, gjatë orëve të mbrëmjes do të zhvillohen po ashtu edhe aktivitete festive me tingujt e muzikës “Jazz”, që do t’i shtojnë gjallërinë qytetit të Shkodrës.
Festivali “Retro” i zhvilluar në qytete të ndryshme të vendit vitet e fundit ka shfaqur interes të veçantë nga vizitorët vendas dhe të huaj.
