Pas kryerjes së më shumë se 200 intervistave dhe zbërthimit të telefonit, hetuesit federalë kanë arritur të zbulojnë shumë gjëra në lidhje me njeriun që kërkoi të vriste ish-presidentin Donald Trump: Thomas Matthew Crooks, një njeri i vetmuar inteligjent, modest, i cili shprehte një interes për armët dhe ishte larg të qenit i hapur për politikën. Por, profili i Crooks gati një javë pas të shtënave i ka lënë autoritetet në mëdyshje rreth një motivi të sulmit të tij dhe ka bërë që hetuesit të spekulojnë se qëllimet e tij mund të kenë qenë më pak për motive politike dhe më shumë për të sulmuar një person të profilit të lartë. Hetimi mbetet në fazat e para, paralajmërojnë zyrtarët. Megjithatë, në një farë mënyre, Crooks duket i ngjashëm me dhjetëra të rinj të tjerë që kanë bërë “namin” në të gjithë SHBA-në me sulmet me armë. Ai kishte pak miq të ngushtë, ai shpesh shkonte të gjuante në një poligon zjarri dhe nuk dukej se shfaqte pikëpamje të forta që do të sugjeronin një vrasje të shtyrë politikisht, sipas intervistave të CNN me organet e zbatimit të ligjit.
Përveç ish-presidentit, Crooks kishte kërkuar në internet për Presidentin Joe Biden dhe kishte foto në telefonin e tij të figurave të tjera të shquara nga të dyja palët. Ai kërkoi vendndodhjen e tubimit të Trump, si dhe Konventën e ardhshme Kombëtare Demokratike, thonë shënimet informuese, dhe zbuloi se Trump kishte planifikuar të mbante fjalim, vetëm një orë me makinë larg shtëpisë së tij në periferi të Pitsburgut. Pra Crooks mund të ketë qenë në kërkim për të kryer një atentat të profilit të lartë dhe afërsia dhe koha e ngjarjes së Trump ofroi mundësinë më të arritshme, kanë spekuluar zyrtarët federalë.“Edhe pse ai nuk e arriti objektivin e tij kryesor, sulmuesi ishte i suksesshëm në shumë mënyra, sepse ai u afrua për të bërë diçka që askush nuk e ka bërë në dekada”, tha një zyrtar federal për CNN, duke iu referuar vrasjes së një kandidati presidencial.
Crooks kishte kërkuar gjithashtu informacione për një tjetër sulmues të kohëve të fundit, i cili qëlloi dhe vrau katër shokë klase në një shkollë të mesme në Michigan në vitin 2021. Kërkimet në internet për Ethan Crumbley, janë në përputhje me atë që zyrtarët e zbatimit të ligjit kanë parë te sulmuesit e të tjerë që hulumtojnë njerëzit që dëshirojnë të bëjnë diçka të tillë.
Por ka edhe dallime midis sjelljes së Crooks dhe asaj të një gjuajtësi tipik. Në ditën e sulmit, Crooks dukej se kishte synuar në mënyrë specifike Trumpin – duke mos synuar turmat në një përpjekje për të vrarë sa më shumë njerëz që të ishte e mundur. Ndërsa ai kishte një eksploziv të improvizuar në bagazhin e makinës së tij, nuk është e qartë nëse ai planifikoi për të vrarë njerëz apo për të shpërqendruar vëmendjen. Ndryshe nga sulmuesit e tjerë që shpesh lënë pas shkrime për të shpjeguar sulmet e tyre, autoritetet deri më tani kanë gjetur pak të dhëna, në dhomën e gjumit të Crooks ose në internet. Anëtarët e familjes së Crooks u thanë hetuesve se ai nuk diskutonte hapur mbi politikën dhe provat e gjetura në shtëpinë e tij nuk hedhin më shumë dritë mbi vlerat apo ideologjinë e tij politike.
