Kryeqyteti i Koresë së Jugut, Seul, regjistroi sot “natën tropikale” të 26-të radhazi. Ky fenomen, ku temperatura nuk zbret nën 25 gradë Celsius nga perëndimi i diellit deri në agim nuk është regjistruar që nga fillimi i regjistrimeve meteorologjike në vitin 1907, sipas të dhënave zyrtare.
Një rast i tillë u regjistrua në vitin 2018, por Agjencia Meteorologjike e Koresë (KMA) e konsideron vitin 2024 si një rekord.
“Ajri i ftohtë nuk vjen nga veriu dhe pasi ne jemi të prekur nga ana jugperëndimore e cila është më e ngrohtë, temperatura regjistrohet vazhdimisht rreth 25 gradë Celsius ose edhe më lartë”, tha Yun Ki-han, drejtor i departamentit të parashikimit meteorologjik.
Temperaturat gjatë natës në Seul nuk ranë nën 26.8 gradë Celsius për 26 ditë rresht.
“Temperaturat e larta gjatë natës pritet të vazhdojnë, me një rekord të ri çdo ditë deri në javën e ardhshme sipas parashikimeve”, tha shërbimi KMA në Seul.
Një pjesë e madhe e planetit po përjeton një verë me vapë intensive. Në korrik, Sekretari i Përgjithshëm i OKB-së Antonio Guterres paralajmëroi për një “epidemi të nxehtësisë ekstreme” dhe bëri thirrje për veprim për të kufizuar ndikimin e valëve të të nxehtit të përkeqësuara nga ndryshimet klimatike.
