Udhëheqësi palestinez i Hamasit, Ismail Haniyeh u vra të mërkurën në mëngjes nga një “bombë e sofistikuar e telekomanduar”, e cila ishte vendosur në rezidencën në Teheran ku ai po qëndronte, jo nga një raketë, siç u raportua më parë, raporton New York Times.
Sipas një raporti gazete që citon shtatë zyrtarë të Lindjes së Mesme, duke përfshirë dy iranianë dhe një amerikan, bomba u vendos në ndërtesën e Gardës Revolucionare iraniane në Teheran dy muaj më parë.
Zyrtarët iranianë, anëtarë të Gardës, thanë se saktësia e sulmit i ngjante pushkës automatike me telekomandë të përdorur nga ekipi izraelit Mossad për të vrarë shkencëtarin bërthamor iranian Mohsen Farkhizadeh në vitin 2020.
Nuk ka pasur asnjë koment zyrtar nga Izraeli për vrasjen e Haniyeh, megjithëse dyshimet kanë rënë kryesisht mbi vendin. Gazeta amerikane citoi zyrtarë të Lindjes së Mesme të kenë thënë se inteligjenca izraelite kishte informuar SHBA-në dhe qeveritë e tjera perëndimore për detajet e operacionit menjëherë pas përfundimit të tij.
“Disa zyrtarë amerikanë që kërkuan të mbeten anonimë” arritën në përfundimin se Izraeli ishte përgjegjës për vrasjen, shton New York Times.
Haniyeh arriti në Teheran të martën për të marrë pjesë në inaugurimin e presidentit të ri të Iranit, Massoud Pezeshkian.
New York Times citoi zyrtarë të cilët thanë se një bombë e ndezur nga distanca vrau Haniyeh dhe truprojën e tij.
Raporti thotë se rezidenca përdorej për pushime, takime sekrete dhe për të pritur mysafirë të shquar si Haniyeh. Shpërthimi shkatërroi xhamat dhe shembi një pjesë të murit të ndërtesës, por dëmi ishte aq i vogël sa ishte shenjë se nuk ishte goditur nga raketa.
Izraeli kërcënoi të vriste Haniyeh dhe udhëheqës të tjerë të Hamasit pas një sulmi vdekjeprurës nga ekstremistët palestinezë nga Gaza, të udhëhequr nga Hamasi, në territorin jugor izraelit më 7 tetor të vitit të kaluar, në të cilin u vranë rreth 1200 njerëz dhe më shumë se 250 pengje u rrëmbyen.
