Një vrasës i dënuar shqiptar po shkel ligjin duke shpërndarë video dhe duke postuar në rrjetet sociale nga qelia e tij në burgun e Mançesterit, pavarësisht se rojet e burgut i konfiskuan telefonat inteligjentë.
Eugert Merizaj ka postuar imazhe dhe video në llogaritë e tij në Instagram dhe TikTok që kur u burgos me 32 vjet në maj për vrasjen e një tregtari droge.
Pavarësisht se stafi i burgut ka sekuestruar të paktën tre pajisje në katër muajt e fundit, ai ende duket se ka akses të rregullt në një smartphone. Posedimi ose përdorimi i celularit në burg pa autorizim është vepër penale, megjithëse ndjekjet penale janë të rralla.
Këtë muaj Merizaj krijoi një llogari në TikTok për të zëvendësuar atë që kishte 60,000 ndjekës kur iu mbyll. Ai tashmë ka rreth 18,000 ndjekës në llogarinë e tij të re. Dje ai filmoi veten në qelinë e tij duke kënduar i veshur me një bluzë dhe pantallona të shkurtra stilisti.
Në një video javën e kaluar ai shihet duke biseduar me grat të ndryshme në një lojë interaktive të drejtpërdrejtë të TikTok. Një imazh i postuar në Instagram e tregonte atë të ulur me derën e qelisë hapur dhe një mbishkrim në shqip “Më i fortë se kurrë”, shoqëruar me muzikë të reperit të njohur shqiptar të quajtur Stresi me titullin “Mos u dorëzo”.
Postimet theksojnë se sa lehtë të burgosurit po thyejnë rregullat ndërsa burgjet përballen me një krizë gjithnjë e më të përkeqësuar të mbipopullimit mes dhunës dhe përdorimit të drogës në rritje.
Merizaj ishte në mesin e katër anëtarëve të një grupi të krimit të organizuar të burgosur pas vrasjes së Hemaëand Ali Hussein, një tregtar kanabisi, në Hartlepool në shtator 2019. Huseini u vra me një armë gjahu pasi banda e Merizajt e çoi atë në një shtëpi të zbrazët duke pretenduar se do bëheshin kolegë tregtarë.
Merizaj, 31 vjeç, u ekstradua nga Belgjika pasi policia ra në gjurmët e tij.
Mësohet se ai është një nga të paktën 66 shqiptarët që kanë aplikuar për t’u transferuar për të vuajtur dënimin në Shqipëri nëpërmjet një skeme transferimi të të burgosurve. Vlerësohet se do t’i kushtojë taksapaguesve më shumë se 1.4 milionë funte nëse Merizaj e vuan dënimin e tij të plotë në Britaninë e Madhe./Top Channel
