Ish-presidenti dhe kandidati republikan presidencial për zgjedhjet amerikane, Donald Trump tha se do të largohet nga Amerika dhe do të shkojë në Venezuelë nëse humbet zgjedhjet e nëntorit.
Në një intervistë në X me miliarderin Elon Musk , Trump tha se Venezuela, e cila është përfshirë nga trazira që nga zgjedhjet presidenciale, do të ishte një “vend shumë më i sigurt”, raporton Washington Examiner.
“Nëse diçka ndodh me këto zgjedhje, të cilat do të ishin një shfaqje horror, ne do të takohemi herën tjetër në Venezuelë, sepse do të jetë një vend shumë më i sigurt për t’u takuar se vendi ynë”, i tha Trump, Musk.
Trump tha se shkalla e krimit në Venezuelë është ulur, ndërsa shkalla e krimit në SHBA është rritur.
Presidenti i Venezuelës Nicolas Maduro ndaloi X në vend, duke vendosur një ndalim 10-ditor më 9 gusht, pasi Musk akuzoi Maduro për përfshirje në “mashtrim masiv elektoral”.
