Edhe pse po bën ndeshje të mira me Realin e Madridit, Kylian Mbappe duket se e ka humbur një pjesë të mirë të popullaritetit që kishte fituar në Francë. Në një sondazh që është publikuar së fundi nga instituti Odoxa, thuhet se popullariteti i Mbappe është në rënie të lirë.
Sipas rezultateve të këtij sondazhi, i cili u krye me pjesëmarrjen e 1005 personave, përfshirë 434 tifozë futbolli, vetëm 54% e francezëve kanë një pikëpamje pozitive për sulmuesin e Real Madridit, popullariteti i të cilit ka rënë me 12 pikë përqindje krahasuar me prillin e kaluar. Megjithatë, 65% e tifozëve të futbollit kanë ende një opinion të mirë për Mbappe, por kjo gjithashtu paraqet një rënie prej 11% në krahasim me një anketë të mëparshme.
Për institutin në fjalë, imazhi i Mbappes po “dobësohet” vazhdimisht, duke qenë se vetëm 58% e francezëve sot e konsiderojnë atë “të pëlqyeshëm”, pra 22% më pak në krahasim me vitin 2019, 57% vlerësojnë se ai është “afër të zakonshmes” -19%) dhe 35% ‘i përulur’ (-31%).
52% e francezëve mendojnë se Mbappe është një zgjedhje e keqe për kapiten të kombëtares, 54% do të donin që Didier Deschamps t’ia jepte shiritin dikujt tjetër dhe 58% mendojnë se Antoine Griezmann është zgjedhja ideale, përqindje e cila rritet në 66% për tifozët e futbollit.
Në të njëjtën kohë, 59% e francezëve besojnë se Ligue 1 nuk është më pak e këndshme për t’u parë në mungesë të Mbappe, 73% e tifozëve besojnë se ai do të ketë sukses në Real dhe 57% se klubi madrilen është më i fortë me të.
