Numri i viktimave nga përmbytjet në Spanjë ka arritur në të paktën 158, teksa ekipet e shpëtimit po vazhdojnë operacionet për gjetjen e të mbijetuarve. Të martën, Spanja u godit nga një stuhi e fuqishme me shira të rrëmbyeshëm që përmbytën, rrugët, banesat dhe bizneset në Valencia.
Sipas ekipeve të shpëtimit në Valencia, në këtë rajon janë gjetur 155 trupa të pajetë. Gjithashtu zyrtarët në Kastilla La Mança dhe në Andaluzi thanë se janë regjistruar edhe tre viktima të tjera në këto dy rajone.
“Ju lutem qëndroni në shtëpi dhe ndiqni udhëzimet e shërbimeve të emergjencës. Tani më e rëndësishmja është që të shpëtojmë sa më shumë njerëz që mundemi”, u tha kryeministri spanjoll banorëve të zonave të prekura.
Mbreti Felipe VI paralajmëroi se ekipet e shpëtimit ende po punojnë në rajonet në lindje dhe jug, të cilat po përballen me motin e keq.
Ekipet e shpëtimit, të mbështetura nga mbi 1.200 trupa kanë vazhduar punën për të gjetur të mbijetuar dhe për të pastruar rrugët. Qindra persona të prekur nga përmbytjet janë vendosur në strehimore të përkohshme, teksa transporti rrugor dhe hekurudhor është ndërprerë gjerësisht.
Autoritetet thanë se do të duhen tre javë që të rihapet një autostradë që lidh Madridin me Valencian, për shkak të dëmeve të shkaktuara nga fatkeqësia natyrore. Shkencëtarët kanë thënë se ndryshimet klimatike, të nxitura nga njeriu, po bëjnë që ngjarje të motit ekstrem të jenë më të shpeshta, më intensive dhe të zgjasin më shumë.
